Biz müharibəni döyüş qanunlarına uyğun apardıq - Rəy

“90-cı illərin əvvəlində ermənilər Azərbaycanın ərazilərini işğal edib, soyqırımılar törədib. Ermənilərin soyqırımına məruz qalmış yaşayış məntəqələrimizdən biri də 1992-ci il aprel ayının 8-də işğala məruz qalmış Kəlbəcər rayonunun Ağdaban kəndidir. Ağdaban kəndinin işğalından sonra ermənilərə Kəlbəcər rayonunun işğal edilməsi üçün şərait yaranmış oldu”.

Bunu Publika.az-a açıqlamasında Milli Məclisin deputatı Azər Badamov deyib.

Deputat qeyd edib ki, Ağdabanda törədilən vəhşilik ermənilərin Azərbaycan xalqına qarşı törətdiyi növbəti soyqırımı aktı idi: “130 evdən ibarət kənd yandırılıb, 67 nəfər vəhşicəsinə qətlə yetirlib, 779 dinc sakinə müxtəlif işgəncələr verilib. Bu gün Azərbaycan öz torpaqlarını işğaldan azad edib. Azərbaycan Ordusu Ağdaban soyqırımını törədənlərin qisasını döyüş meydanında alıb. Lakin ordumuz ermənilərin bizə qarşı törətdikləri vəhşilikləri onlara qarşı təkrarlamadı. Biz ermənilərdən fərqli olaraq müharibəni döyüş qanunlarına uyğun, mülki insanları qətlə yetirmədən apardıq.

Lakin xalqımıza qarşı olmazın soyqırımıları törətmiş erməni ordusunu məhv etdik. Biz indi soyqırımı tarixlərini qəhrəman və düşməndən qisasını döyüş meydanında almış xalq kimi yad edirik. Zaman gələcək ki, Azərbaycan beynəlxalq məhkəmələrdə ermənilərin cəzalandırılması və təzminatların ödətdirilməsi məsələlərini qaldıracaq. Biz ermənilərin vəhşi, əli dinc insanların qanına bulaşmış və soyqırımılar törətmiş bir toplum olduğunu dünyaya daha geniş şəkildə çatdıracağıq”.