Ermənistanın Azərbaycana vurduğu ziyanın məbləği açıqlandı

“Azərbaycanın Dağlıq Qarabağ ərazisinin və ətraf 7 rayonun Ermənistan tərəfindən işğal edilməsi nəticəsində Azərbaycanın tarix və mədəniyyət abidələri üzrə dəyən zərər 177 milyard ABŞ dollar, əhalinin mülkiyyətinə dəyən zərər isə 55,4 milyard ABŞ dollar təşkil edib”.

Publika.az-ın məlumatına görə, bunu qiymətləndirmə üzrə ekspert, Azərbaycanın məruz qaldığı itki və tələfatların hesablanması üzrə İşçi qrupunun üzvü Nüsrət İbrahimov bu gün Bakıda keçirilən “Müasir Azərbaycanın unikal inkişaf modeli və tarixi erməni təcavüzünün beynəlxalq qiymətləndirilməsi reallıqları” mövzusunda konfransda çıxışı zamanı bildirib.

Onun sözlərinə görə, Azərbaycanın yerüstü və yeraltı təbii sərvətlərinin ermənilər tərəfindən talan edilərək məhv edilməsi nəticəsində dəymiş birbaşa və dolayı zərərlərin dəyəri isə 190 milyard ABŞ dollarından artıq olacağı heç kəsdə şübhə doğurmur.

N.İbrahimov deyib ki, Azərbaycanın itkiləri düşmən təcavüzü davam etdiyi müddətdə ilbəil artmaqda davam edir.

Vasif Həsənli