Paşinyan Qarabağda HƏRƏKƏTƏ KEÇDİ - Torpaqlarımızda ÖLÜM-DİRİM SAVAŞI

Ermənistanda Nikol Paşinyan komandası ilə Azərbaycanın işğal edilmiş ərazilərində yaradılan, köhnə hakimiyyətə yaxın olan separatçı rejim arasında qarşıdurma davam edir.

Publika.az xəbər verir ki, Paşinyanla separatçı rejimin “rəhbəri” Bako Saakyan İrəvanda təkbətək görüş keçirib.

Görüşdə daxili və xarici məsələlərin müzakirə edildiyi deyilsə də, konkret nələrdən danışıldığı dəqiq məlum deyil, lakin bu gün separatçı rejimin “müdafiə naziri” Levon Mnasakanyanın vəzifəsindən azad edilməsi diqqət çəkdi.

Erməni şərhçi Aram Amatuni yazır ki, seçkidən öncə Paşinyanın Saakyandan izahat tələb etməsinə baxmayaraq, bu görüş tərəflərin razılaşdığını deməyə əsas verir.

“Gözləniləndir ki, Qarabağda yeni kadr dəyişiklikləri olsun, eləcə də başqa “məmurlar” da çıxarılsın”.

Nikol Paşinyanın Qarabağdakı separatçı rejimi tamamilə dəyişdirmək və özünə bağlı rejim yaratmaq planı var. Çünki keçmiş hakimiyyətin əsas dayaq nöqtəsi məhz Qarabağdakı bugünkü separatçı rejimdir. Lakin bu, hələlik o qədər də asan deyil. Çünki Paşinyan hələ öz hakimiyyətinin dayaqlarını tam olaraq möhkəmləndirməyib.

Erməni şərhçilər Paşinyanın Qarabağda istədiyinə nail olmaq üçün zaman ehtiyacının olduğunu hesab edirlər, lakin o da istisna deyil ki, bu proses ciddi qarşıdurma fonunda keçsin. Hazırda İrəvanla Qarabağdakı separatçı rejim arasındakı toqquşmaların davam etməsi də bunu deməyə əsas verir.

Asif