Ermənistanda bioloji silah mərkəzləri: Moskva və Pekin HƏRƏKƏTƏ KEÇDİ

Koronavirus pandemiyasının yayılmasından sonra ABŞ və Çinin qarşılıqlı “bioloji silah” ittihamları Ermənistandakı bioloji laboratoriyaların təhlükəsini aktuallaşdırıb.

Publika.az xəbər verir ki, Çin artıq rəsmi şəkildə məsələyə münasibət bildirib.

Bu ölkənin Xarici İşlər Nazirliyinin rəsmi nümayəndəsi Gen Şuan Rusiya XİN-in sözçüsü Mariya Zaxarovanın bəyanatını araşdırdıqlarını, ABŞ-ın post-sovet məkanında mövcud olan bir çox bioloji laboratoriyasının narahatlıq yaratdığını deyib.

“Bu, qonşu ölkələrin əhalisi üçün ciddi təhlükə yaradır. Yerli ictimaiyyət bu obyektlərin bağlanmasını tələb edir. Ümid edirik ki, ABŞ tərəfi məsuliyyətli mövqe tutacaq, beynəlxalq ictimaiyyətin narahatlığını qəbul edəcək və belə qorxuları aradan qaldırmaq üçün real addımlar atacaq”, - Gen Şuan bildirib.

Pekinin rəsmi mövqeyindən sonra Ermənistan mediası Çin-ABŞ qarşıdurmasının İrəvan üçün hansı nəticələrə səbəb olacağından yazır.

“Xüsusilə Çinin bu məsələdə Rusiyanın mövqeyindən çıxış etməsi Ermənistandakı ABŞ laboratoriyasının bağlanması üçün təzyiqlərin artacağı perspektivini yaradır”, - erməni jurnalist Mariam Qriqoryan yazır.

Erməni ekspert Suren Sarkisyan bildirib ki, Ermənistan Çinə bu laboratoriyalara giriş təklifi verə bilər: “Yalnız o halda bu obyektlərin təhlükə yaratmadığını göstərmək olar. Həmçinin, laboratoriyaya nəzarətin Ermənistana məxsus olduğuna inandırmalıyıq”.

Politoloq Yevan Poqosyan isə Ermənistan hakimiyyətini ittiham edir və qeyd edir ki, bu laboratoriyaların təhlükəsizliyinə ciddi riayət edilməlidir: “Əgər sən zəif dövlətsənsə və başqa ölkələr sənin ərazində laboratoriyalar yaradırsa, burada ilk təhlükə sənə qarşıdır və əsas günahkar da sənsən”.

Pandemiya ilə güclənən ABŞ-Çin qarşıdurmasının Ermənistandakı laboratoriyalara da təsir edəcəyi istisna deyil. Rusiya tərəfi dəfələrlə Ermənistandan bu mərkəzlərə giriş imkanı yaratmağı tələb edib. Hətta ötən ilin noyabrında Rusiya Xarici İşlər naziri Sergey Lavrovun İrəvan səfəri zamanı bu məsələ müzakirə olunmuşdu və Ermənistan tərəfi ilin sonuna kimi giriş imkanı yaradacağını bildirmişdi. Lakin bu, hələki baş tutmayıb. İndi Çinin də Rusiyanın mövqeyindən çıxış etməsi Ermənistanı çətin vəziyyətə salır.

Bu, laboratoriyalar ABŞ-a məxsusdur, Ermənistan “nəzarət bizdədir” desə də, Pentaqonun icazəsi olmadan obyektə giriş mümkün deyil. Belə vəziyyətdə Ermənistan Moskva-Pekin cəbhəsi ilə Vaşinqton cəbhəsi arasında sıxılmış vəziyyətdə qalacaq.

Ermənistanda ABŞ-a məxsus 3 laboratoriya var. Bunlar İrəvan, Gümrü və İcevan şəhərlərində yerləşir. Layihəni ABŞ Müdafiə Nazirliyinin (Pentaqon) təhlükələrinin azaldılması üzrə agentliyi maliyyələşdirir. Ermənistan Kənd Təsərrüfatı Nazirliyinə referens-laboratoriyanın yaradılması məqsədi ilə 4,1 milyon dollar ayrılıb. Bundan başqa, 9,8 milyon Ermənistan Səhiyyə Nazirliyinə “nəzarət və xəstəliklərin profilaktikası üzrə Milli Mərkəz” adlanan laboratoriyanın təmiri üçün verilib. 1,7 milyon dollar isə hər iki müəssisə üçün yeni avadanlıqların alınmasına ayrılıb.

Mediada bu laboratoriyalarda virusların mutasiya olunması üzərində iş aparıldığı iddia olunur. Rusiya tərəfi də bu laboratoriyaların təhlükəsini rəsmi şəkildə açıqlayıb.

Asif