Ermənistan ordusuna cəlb olunan muzdlular döyüşə girməkdən imtina edir - EKSPERT

Ermənistan İraq, Suriya və digər ölkələrdən muzdlu döyüşçüləri Dağlıq Qarabağa gətirməyə davam edir. Onlar əvvəlcədən də ordularının gücünə inanmırdı. Amma o muzdlular primitiv silahlarla vuruşmağa öyrəşiblər.

Bu sözləri Publika.az-a açıqlamasında Milli Qəhrəman, ehtiyatda olan polkovnik-leytenant Vahid Quliyev deyib. O, bildirib ki, bu yaxınlarda muzdlu döyüşçülərin səs yazıları yayılıb.

“Bu səs yazılarından məlum olub ki, Ermənistana gətirilən muzdlu döyüşçülər peşmandır. Çünki onlar yeni nəsil silahlarla döyüşməyi bilmirlər. Nə qədər muzdlu döyüşçü cəlb etsələr də, faydası olmayacaq, bizim silahların qarşısında acizdilər. Hazırda da onlar döyüşə girməkdən imtina edir. İnanmıram ki, gətirilən hansısa muzdlu döyüşçülər Ermənistan ordusunun itirilmiş qüvvəsini bərpa etsin. Əvvəla, Ermənistanın onları maliyyələşdirməyə imkanı yoxdur. Çox güman ki, bu maliyyə dəstəyini erməni diasporaları verir. Bu da bir yerə qədər olacaq, bir neçə aydan sonra heç kim onlara pul verən deyil.

Ermənistan ordusu birinci Qarabağ müharibəsində də muzdluları cəlb etmişdi, amma onların pullarını verə bilmədikləri üçün sonradan güllələmişdilər. Bu cür təcrübələr indi də olacaq. Muzdlular özləri qaçıb gedəcək”.

Hərbi ekspert onu da əlavə edib ki, terrorçuların Ermənistana gətirilməsi regiondakı ölkələr üçün də təhlükəlidir:

“İstənilən vaxt terror aktları həyata keçirə, müəyyən təxribatlar törədə bilərlər. Təbii ki, region ölkələri üçün təhlükəlidir. Ermənistanın sadəcə Azərbaycana qarşı torpaq iddiası yoxdur. Gürcüstan və Türkiyəyə qarşı da çirkin iddialar irəli sürürlər. Buna baxmayaraq, Ermənistanın onları maliyyəşdirməyə gücü çatmayacaq. Özləri çıxıb gedəcəklər”.

Aytən Məftun