Müstəqilliyin Bərpası Günü: Azərbaycanın strateji qərarı nəyə hesablanıb?

Müstəqilliyin Bərpası Günü: 18 oktyabr tarixi niyə belə adlandırıldı, 28 May tarixi niyə Müstəqillik Günü oldu, bu dəyişiklik bizə nə verə bilər?

- 18 oktyabr 1991-ci ildə qəbul edilmiş Konstitusiya Aktında “müstəqil Azərbaycan dövləti 1918-1920-ci illərdə mövcud olmuş Azərbaycan Xalq Cümhuriyyətinin hüquqi varisidir” sözləri əksini tapsa da, 18 oktyabrın Müstəqillik Günü olması Cümhuriyyətlə Respublika arasında hüquqi uçurum yaradırdı: 18 oktyabrın Müstəqilliyin Bərpası Günü olması Azərbaycanın Cümhuriyyətin varisi olduğunun hüquqi əsasını formalaşdırır;
- Cümhuriyyətin hüquqi varisi olmağımız ermənilərin keçmiş DQMV-nin müstəqil Azərbaycanın tərkibində olmadığı iddiasını sıradan çıxır;
- Bu, 1920-ci ildə Ermənistana verilmiş Zəngəzura iddia etmək imkanımızı daha da gücləndirir;

Ən mühüm məqam isə 28 May tarixinin Respublika yox, Müstəqillik Günü olmasıdır.

28 mayın Respublika Günü olması Azərbaycanın dövlət olaraq 1918-ci ildə yarandığı iddialarının mənbəyini təşkil edirdi: bu iddia xüsusilə Ermənistan və İran tərəfindən irəli sürülür; Ermənistan İrəvanın ermənilərə verilməsi, İran Cənubi Azərbaycanın zəbt edilməsi faktını itirmək istəyir;

28 Mayın Müstəqillik Günü olması Azərbaycan dövlətinin 1918-ci ildən öncə də mövcud olduğu və istiqlaliyyətini bu tarixdə qazandığı həqiqətinin hüquqi əsasını yaradır. Və bu, bizim olan İrəvana da, Cənubi Azərbaycana da iddia edə biləcəyimizə imkan verir.

Cümhuriyyəti quranların da, müstəqilliyi bərpa edənlərin də arzusu idi bu. Və bunun məhz müharibədən sonra edilməsi dövlətin gələcək strategiyasını anlamağa imkan verir.

O da simvolikdir ki, Müstəqilliyin Bərpası Gününün 30-cu ildönümünü həm də Xudafərin körpüsünün azad edilməsi günü olaraq qeyd edirik.

İstiqlalımız daim olsun...

Asif Nərimanlı