Prezident hər bir forumda erməni vəhşiliklərini dünyaya çatdırır - Rəy

“Azərbaycan Ermənistanın etdiyi vəhşilikləri dünya ölkələrinə çatdırır. Prezident İlham Əliyev bu məsələ ilə bağlı ciddi addımlar atır. Prezidentin rəhbərliyi ilə ermənilərin törətdiyi vəhşiliklərlə bağlı 44 günlük müharibədən əvvəl də dünya ölkələrinə məlumatlar çatdırılırdı”.

Bunu Publika.az-a açıqlamasında millət vəkili Elman Məmmədov deyib.

Deputat qeyd edib ki, İlham Əliyev hər bir forumda erməni vəhşiliklərini dünyaya çatdırır: “Torpaqlarımızın işğaldan azad olunması üçün apardığımız mübarizə, ermənilərin dinc əhaliyə qarşı törətdikləri cinayətlər və işğal dövründə ermənilərin etdiyi vandalizmlərin hər biri Prezident İlham Əliyev tərəfindən dünyaya çatdırılıb. VIII Qlobal Bakı Forumunda da ölkə başçısı həmin məsələlərlə bağlı məlumat verdi. Forumda həm də Azərbaycanın mövqeyi açıqlandı. İlham Əliyev bir daha bəyan etdi ki, Azərbaycan sülhsevər dövlətdir və bölgədə sülhün bərqərar olmasının tərəfdarıdır. Biz müharibədən əvvəl də Ermənistan tərəfinə sülhlə bağlı çağırışlar etmişik. İlham Əliyev qeyd etdi ki, əgər Ermənistan bizim çağırışlarımızı eşitsəydi və müvafiq beynəlxalq qurumlar bizim çağırışlarımıza laqeyed yanaşmasaydı, müharibə olmayacaqdı. Çünki biz deyirdik ki, torpaqlarımızdan çıxın və ərazi bütövlüyümüzü tanıyın. Yəni müharibə Ermənistanın və bəzi ölkələrin laqeydlikləri ucbatından oldu. Ermənistanın qeyri-konstruktiv mövqeyi və müxtəlif sərsəm bəyanatları forumda iştirak edən ölkələrin nəzərinə çatdırıldı. Bu tədbirdə dünyanın çoxsaylı ölkələri təmsil olunurdu. Həmin nümayəndələr də tədbirdə deyilənləri öz ölkələrində işıqlandıracaqlar. Prezident İlham Əliyevin rəhbərliyi altında bu sahədə işlər görülür və bu işlər əvəzolunmazdır”.

Rahib Ələsgərov