Pezeşkianın Əliyevə zəngi: İran Naxçıvana hücumla bağlı nə edəcək?

Məsud Pezeşkian İlham Əliyevə zəng edib. Telefon söhbətində əsas diqqətçəkən məqam Pezeşkianın Naxçıvana hücumun İranla əlaqəsinin olmadığı haqda sözləridir. Hücum İran ərazisindən edilib, bunun təxribat, yaxud məqsədyönlü şəkildə olması problemi də onlara aiddir. Bütün hallarda məsuliyyət İranın üzərinə düşür.

Əliyev telefon söhbətində hadisənin araşdırılmasının vacibliyini qeyd edib, Pezeşkian da araşdırılacağını deyib.

Hərçənd, İran tərəfinin hadisəni ədalətli araşdıracağı şübhə altındadır.

Birincisi, Tehrandakı səfirliyimizə hücumun “araşdırılması” təcrübəsi var: uzun müddətdən sonra hücumu edən şəxs cəzalandırılsa da, sifarişçilər məsuliyyətdən kənarda qaldı;

İkincisi, Naxçıvan hücumunun birbaşa SEPAH-ın planı olduğuna dair əsaslı şübhələr var, bu baxımdan, məsələnin ədalətli həlli ehtimalı zəifdir;

Üçüncüsü, Pezeşkian sağlam yanaşma sərgiləsə də, İrana faktiki nəzarət edən SEPAH-ın eyni mövqedən çıxış etmədiyi reallığı var: onun qonşu ölkələrə hücumlara görə üzr istəməsi və hücumların dayandırıldığı haqda fikirlərinin rejim daxilində tənqidlə qarşılanması, hətta təkzib edilməsi də bundan qaynaqlanır;

O da nəzərə alınmalıdır ki, Pezeşkianın Əliyevə zəngi SEPAH-ın Azərbaycanı təhdid etməsi fonunda baş verir. Bu baxımdan, hadisənin ədalətli araşdırılacağı gözləntisi az olmaqla yanaşı, SEPAH-ın Azərbaycana yeni hücum cəhdlərinin olacağı riski də qalır.

Bakının tələbləri isə dəyişmir: hadisə araşdırılmalı, günahkarlar məsuliyyətə cəlb olunmalıdır. Əks təqdirdə, sərt mövqe davam edəcək.

Asif Nərimanlı