Paşinyanı devirmək üçün "seçki hiyləsi" hazırlanır - Akopyan detalları açdı

Ermənistanda hakim “Vətəndaş müqaviləsi” partiyasının seçkilərdə səslərin 50 faizindən çoxunu qazanmaq şansı yoxdur.

Publika.az xəbər verir ki, bu iddia ilə erməni ekspert Vigen Akopyan çıxış edib.

O, son rəy sorğularına istinadən belə düşündüyünü bildirib.

“Hər iki vətəndaşdan biri hakim partiyanın iqtidarda qalmasını istəmir. Hakimiyyətin koalisiya yarada biləcəyi tərəfdar partiyaları da çox pis nəticələr göstərir. Araşdırmalara görə, bu partiyalar minumum həddi keçə bilməyəcək. Seçkidə yüksək fəallıq olarsa, hakimiyyət üçün vəziyyət daha da pisləşəcək”, - o bildirib.

“Gallup İnternational”ın Ermənistan ofisinin sorğularına əsasən seçkidə 60 faiz fəallıq olacağı gözlənilsə də, Akopyan bunun qeyr-real olduğunu düşünür.

Onun fikrincə, hakimiyyət 50 faizdən çox səs toplaya bilməsə, müxalifətin seçkidən sonra birləşmə ehtimalı yüksəkdir: “Əvvəlki bələdiyyə seçkilərinin təcrübəsi göstərdi ki, hakim partiya səslərin yarısından çoxunu toplaya bilmədikdə, rəqiblərin ümumi nəticələri yerli idarəetmə orqanını götürməyə imkan verir. Oxşar ssenari iyun ayında keçiriləcək parlament seçkilərində də təkrarlana bilər”.

Erməni ekspertin iddiasına görə, müxalifət qüvvələrinin vahid cəbhədən çıxış etməməsinin müsbət və mənfi tərəfləri var.

“Mənfi tərəflər müxalifətin səslərinin dağılmasıdır. Lakin müsbət tərəfələri daha çoxdur. Misal üçün, birləşmiş seçki dairələri olarsa, bir müxalifət qüvvəsini dəstəkləyən, lakin digərinə qarşı çıxan seçicilər tərəddüdə düşə bilərlər. Seçkilərdən sonra bu qüvvələr parlamentə daxil ola bilsələr, səslərini birləşdirə və sadə səs çoxluğu qazana bilməyən hakim partiyanı devirə bilərlər. Birləşmiş seçki dairələri həm də hakimiyyətin müxalifət ittifaqını seçkilərdə qeydiyyata almaması riskini də yaradır”, - o bildirib.

Qeyd edək ki, “Gallup İnternational” şirkətinin Ermənistan ofisinin son sorğusunda Paşinyanın komandası öndə olub. Sorğuda iştirak edən respondentlərin 24,3 faizi hakim partiyaya, 13,4 faizi “Güclü Ermənistan”, 7,9 faizi “Çiçəklənən Ermənistan” partiyalarına səs verəcəklərini bildirib. Robert Koçaryanın “Ermənistan” bloku isə 5,5 faiz səs toplayıb.

Müəllif: Asif