Parlamentdə qazilərlə bağlı UNİKAL TƏKLİF

“Diqqəti bir problemə çəkmək istərdim. Bu bizim hamımızın üzləşdiyi problemdir. Qazilərimizin, yaralılarımızın üzləşdiyi problemdən bəhs edirəm. Təəssüflər olsun ki, qazilərimiz sənəd almaq üçün növbəyə durmalı olurlar, bəzən bir sənəd üçün hansısa qurumlara dəfələrlə gedib-gəlməli olurlar”.

Publika.az xəbər verir ki, bu fikirləri Milli Məclisin bu gün keçirilən plenar iclasında çıxışı zamanı Nigar Arpadarai deyib.

Millət vəkili qeyd edib ki, bu qurumlar işlərini müəyyən prosedurlara uyğun şəkildə qurub və bu, anlaşılandır: “Bu prosedurlar tələb edir ki, sənəd almaq üçün bir və ya bir neçə dəfə ora gedilsin. Ancaq hesab edirəm ki, qazilərimizin işini yüngülləşdirməli, dövlətimizin onların yanında olduğunu növbəti dəfə göstərməliyik. Təklif edirəm ki, bu problemi yoluna qoymaq üçün “ASAN xidmət” modelində qurum yaradılsın. Bu halda könüllülər hətta sənədləri qazilərə evlərində çatdıra bilərlər. Sözsüz ki, qazilərimiz bir sənəd üçün dəfələrlə gedib-gəlməməlidirlər”.