Nida Xəbər

Mədət Quliyev “Dubai Airshow-2021”də - FOTO

14 Noyabr 2021 16:08

Birləşmiş Ərəb Əmirliklərinin Dubay şəhərində “Dubai Airshow-2021” 17-ci aviasiya sərgisi keçirilir.

Publika.az xəbər verir ki, iki ildən bir təşkil olunan və 4 gün davam edəcək sərgidə dünyanın 100-dən çox ölkəsindən naviqasiya aparatları, müşahidə və kommunikasiya sistemləri, süni intellekt avadanlıqları, PUA və təyyarələr, kosmik peyk və s. istehsalçısı olan 1000-ə yaxın şirkət iştirak edir.

Dubayın vəliəhd şəhzadəsi və İcra Şurasının sədri Hamdan bin Məhəmməd bin Rəşid Əl Maktumun iştirakı ilə keçirilən açılış mərasimində Azərbaycanın Müdafiə Sənayesi naziri Mədət Quliyev də iştirak edib.

Tədbir çərçivəsində Mədət Quliyevin "İnternational Golden Group" şirkətinin icraçı direktoru Fadel Saif Əl Kaabi ilə görüşü baş tutub.

Görüş zamanı hər iki ölkə arasında hərbi-texniki sahədə mövcud əməkdaşlığın gələcəkdə daha da genişləndirilməsi istiqamətində geniş fikir mübadiləsi aparılıb.

Danışıqlar konstruktiv və qarşılıqlı anlaşma şəraitində keçib.