“Dövlət rüsumu haqqında” qanun layihəsi birinci oxunuşdan keçdi

Parlament “Dövlət rüsumu haqqında” Azərbaycan Respublikasının Qanununda dəyişiklik edilməsi barədə qanun layhəsini birinci oxunuşda qəbul edib.

Publika.az xəbər verir ki, layihə haqqında deputatlara komitə sədri Tahir Mirkişili məlumat verib.

O qeyd edib ki, dəyişikliklər əsasən 4 istiqamətdədir: “Birinci istiqamətdə adətən rüsum toplayan orqanların balansında yığdıqları rüsumun müəyyən hissəsi qalırdı. Bu dəyişikliklə rüsum toplayan orqanların heç birində rüsumların müəyyən hissəsi qalmayacaq. İkinci istiqamət odur ki, bəzi rüsumlar Nazirlər Kabineti və ya Prezidentin qərarı ilə müəyyən edilirdi. Bundan sonra rüsumlar qanun bazasında formalaşacaq. Qeyd edim ki, bununla bağlı cəmiyyətdə müəyyən fikirlər yayılmışdı. Burada avtomobillərin və ya mobil telefonların rüsumlarının qaldırılmasından söhbət getmir. Üçüncüsü, odur ki, bir sıra istiqamətlər üzrə dövlət rüsumları müəyyən edilməmişdi, ancaq indi edilir. Dördüncü istiqamət üzrə qeyd edim ki, bir sıra rüsumların qiymətinin qaldırılması nəzərdə tutulur. Səbəb odur ki, uzun illərdir -15 ildən çoxdur ki, bu rüsumların qiyməti dəyişməyib”.