• USD 1,7000 0,00% EUR 1,9208 -0,23%
    • GBP 2,2592 -0,02% RUB 0,0230 +0,43%

Bütöv Azərbaycan Ocaqları Baxçalının Ərdoğana verdiyi xəritəyə irad bildirdi - FOTO

Bütöv Azərbaycan Ocaqları Baxçalının Ərdoğana verdiyi xəritəyə irad bildirdi - FOTO

Bu günlərdə Türkiyə Milliyyətçi Hərəkat Partiyası başqanı Dövlət Baxçalının Türkiyə Prezidentinin iqamətgahında hörmətli Rəcəb Tayyib Ərdoğana bağışladığı Türk Dünyası xəritəsi dünya mətbuatında, özəlliklə Türk Cümhuriyyətlərində və başqa türklər yaşayan bölgələrdə geniş müzakirə və coşquya səbəb olub. Özəlliklə Türk Dövlətləri Təşkilatının İstanbul Zirvə görüşündən sonra baş vermiş bu hadisə dünya mediasında özəl bir mesaj kimi dəyərləndirilib, bütün dünyadakı müstəqil və müstəqil olmayan türkləri coşdurub, türk düşmənlərini də çox narahat edib.

Publika.az xəbər verir ki, bu barədə Bütöv Azərbaycan Ocaqları başqanının türk dünyası ilə əlaqələr üzrə müavini, fəlsəfə doktoru Faiq Ələkbərli mətbuata açıqlama yayıb. Bildirib ki, bu xəritədə müstəqil türk dövlətlərilə yanaşı, daha çox türklər yaşayan şəhərlərin yer alması xüsusilə İranda yaşayan soydaşlarımız tərəfindən sevinc və coşquyla qarşılanıb.

“Onlarda bütöv Türk Dünyasının gələcəyinə böyük ümidlər doğurub. Qeyd etməliyik ki, keçən il Türkiyə və Azərbaycan dövlətlərinin birgə əməkdaşlığı fonunda baş vermiş Qarabağ zəfərinin də türk dünyasının birlik və bütövlüyünə olan ümidlərin yaranmasında ayrıca yeri və önəmi var.

Biz Bütöv Azərbaycan Ocaqları (BAO) olaraq qurulmaqda olan Türk Dünyasının gələcək konturlarını bütün dünyaya elan edən hörmətli Rəcəb Tayyib Ərdoğan və Dövlət Baxçalıya öz minnətdarlığımızı bildirməklə yanaşı, bu xəritədə özünü göstərən bir anlaşılmazlıq haqqında narahatlığımızı dilə gətirmək istərdik. Tarixdən və bizim tərtib etdiyimiz xəritədən bəlli olduğu kimi, Azərbaycanın güneyinin sərhədləri Türkiyə Cümhuriyyəti və Azərbaycan Respublikasının sınırlarından başlayaraq Tehran və Həmədan şəhərinə qədərki bütün əraziləri əhatə edir. Təəssüf ki, sayın Baxçalının sayın Ərdoğana hədiyyə etdiyi xəritədə Azərbaycanın güneyinin coğrafiyasına yalnız Zəncana qədərki ərazilər daxil edilib, Qəzvin, Savə, Tehran, Kərəc, Həmədan və s. tarixi türk bölgələri kənarda qalıb. İranın coğrafiyasına bələd olan hər kəs bilir ki, adları çəkilən şəhər və bölgələrdə yaşayan əhalinin çoxu türklərdir və onlar bütün rəsmi qadağalara baxmayaraq, öz ana dillərində – Azərbaycan türkcəsində danışırlar. Təkcə İranın başkəndi Tehran şəhərində ən azı 8-9 milyon soydaşımız yaşamaqdadır.

Biz Bütöv Azərbaycan Ocaqları (BAO) olaraq həmin xəritədə yer alan bu anlaşılmazlığa hər iki böyük dövlət adamının diqqətini çəkmək və gələcək fəaliyyətlərində bu kimi məsələlərdə xüsusilə həssas olmalarını bir daha vurğulamaq istəyirik”.

Halal Nemət

Xəbər lenti

DAHA ÇOX XƏBƏR