Azərbaycan mədəni müxtəlifliyi ilə tanınır - Günay Əfəndiyeva

Azərbaycan etnik qrupları, mədəni müxtəlifliyi ilə tanınır.

Publika.az xəbər verir ki, bunu “Mədəniyyət naminə sülh” qlobal kampaniyasının Tərəfdaşlar Forumunda çıxış edən Beynəlxalq Türk Mədəniyyəti və İrsi Fondunun rəhbəri Günay Əfəndiyeva bildirib.

O qeyd edib ki, ölkəmizdə bütün xalqların nümayəndələri sülh və harmoniya içində yaşayır: “Azərbaycan keçən il çox ağır, həm də şərəfli bir dövr yaşadı. Qarabağ qələbəsi tarixə qızıl hərflərlə yazıldı. Bu, bütün türk dünyası üçün vacibdir. Qarabağın reallıqları, tarixi-mədəni irsi çox önəmlidir”.

Qeyd edək ki, ADA Universitetində “Mədəniyyət naminə sülh” Tərəfdaşlar Forumu (“Peace4Culture” Partners Forum) işə başlayıb. BMT-nin Sivilizasiyalar Alyansı, İslam Dünyası Təhsil, Elm və Mədəniyyət Təşkilatı (ICESCO), ADA Universiteti və Azərbaycan Respublikası Mədəniyyət Nazirliyinin birgə təşkilatçılığı ilə reallaşan tədbirdə dövlət rəsmiləri, bir sıra beynəlxalq təşkilatların və sülhün təşviqi üzrə ixtisaslaşmış institutların, diplomatik korpusun rəhbər şəxsləri və nümayəndələri iştirak edirlər.

Aytən Məftun