“Azərbaycan–Baltik mədəni əlaqələri” kitabı işıq üzü görüb

Bu ilin iyulunda Vilnüsdə Litva Azərbaycanlıları Cəmiyyətinin sədri, Litva Yazıçılar İttifaqının üzvü, ədəbiyyatşünas, publisist və tərcüməçi Mahir Həmzəyevin “Azərbaycan–Baltik mədəni əlaqələri” komparativistik araşdırmalar kitabı çap olunub.

Publika.az bildirir ki, bu barədə Azərbaycanın Litvadakı səfirliyindən məlumat verilib.

Məlumatda deyilir ki, kitab ölkəmizin Litvadakı səfirliyinin dəstəyi ilə işıq üzü görüb. Onun nəşri 1918-ci ildə müstəqil Azərbaycan, Estoniya, Latviya və Litva respublikalarını yaratmış, həmin dövrdə dövlətlərarası əlaqələrimizin təməlini qoymuş, istiqlalın tanınması yolunda birgə mübarizə aparmış Azərbaycan və Baltik xalqlarının Vətən sevdalı övladlarının şanlı xatirəsinə həsr edilib.

Beş yüz səhifədən ibarət bu irihəcmli nəşrə müəllifin Azərbaycan və Baltik xalqları (litvalılar, latışlar və estonlar) arasındakı çoxvektorlu mədəni əlaqələrə dair müxtəlif illərdə və fərqli janrlarda yazdığı 130-dan çox müqayisəli araşdırma işi və KİV-lərə verdiyi müsahibələr daxil edilib.

Ensiklopedik xarakter daşıyan kitab Azərbaycan və Baltik dövlətləri müstəqillik əldə etdikdən sonra bu mövzuda dilimizdə çap edilən ilk nəşrdir. Mövzuların çoxu dövlətlərimizin istiqlal tarixində ilk dəfə olaraq müstəqillik dövrünün mədəniyyət siyasəti doktrinasına uyğun ideoloji yanaşmalar, keçmişə yeni baxış və yeni konseptual dəyərləndirmələrə əsaslanan tədqiqat bucağı altında araşdırılıb.

Topluda, həmçinin ədəbiyyatlarımızın qarşılıqlı təsiri, “Kitabi-Dədə Qorqud” eposunun litva, latış və eston dillərinə tərcüməsi ilə bağlı tədqiqatlar, dahi Azərbaycan şairi Nizaminin yaradıcılığının XIX əsrdən başlayaraq Litvada öyrənilməsi və əsərlərinin burada yayımlanması barədə tarixi araşdırmalar, habelə bir sıra Azərbaycan müəlliflərinin yaradıcılığının Baltik mədəniyyətləri ilə əlaqələri haqqında ədəbi məqalələr yer alıb.

Kitabın əsas məramı Azərbaycan və Baltik xalqları arasındakı tarixi və ictimai-mədəni əlaqələrin köklərini axtarıb üzə çıxarmaq, bu əlaqələr əsasında ölkələrimiz arasında yeni məzmunlu mədəni körpülər salmaq, müasir dövrdə münasibətlərimizi genişləndirmək, xalqlarımızı mənəvi cəhətdən bir-birinə yaxınlaşdırmaq, Baltik ölkələrində bizə dost münasibət bəsləyənlərin sıralarını genişləndirməkdən ibarətdir.

Nəşr həm də Azərbaycanla Baltik ölkələri arasında mədəni əməkdaşlıq və dialoq strategiyasını daha məzmunlu və dinamik tərzdə həyata keçirməyə stimul vermək məqsədi daşıyır.

Kitab Vilnüsdəki məşhur “BALTO print” mətbəəsində 500 tirajla çapdan çıxıb.

Əsər geniş oxucu auditoriyası, o cümlədən kulturoloqlar, tarixçilər, ədəbiyyatçılar, politoloqlar, konfliktoloqlar, etnoloqlar, beynəlxalq icmalçılar, eləcə də multikultural cəmiyyət, dövlətlərarası münasibətlər, diaspor, mədəniyyət və etniklər siyasəti sahəsində çalışanlar üçün nəzərdə tutulub.

(azərtac)