Tokayev Moskva və İrəvana mesaj verdi: Ərazi bütövlüyü məsələsi...

Qazaxıstan bütün dövlətlərin ərazi bütövlüyünü dəstəkləyir və bu prinsipə prioritet diqqət yetirəcək.

Publika.az xəbər verir ki, bunu Qazaxıstan Prezidenti Kasım-Jomart Tokayev Türk Dövlətləri Təşkilatının (TDT) liderlərinin sammitində bildirib.

“Qazaxıstan bütün dövlətlərin ərazi bütövlüyünü qətiyyətlə dəstəkləyir, həmçinin BMT Nizamnaməsinə ciddi əməl etməyi zəruri hesab edir”, - deyə cənab Tokayev qeyd edib.

Sentyabrın 26-da Qazaxıstan Xarici İşlər Nazirliyinin rəsmi nümayəndəsi Aybek Smadiyarov bildirib ki, ölkə hakimiyyəti Donbasın, eləcə də Zaporojye və Xerson vilayətlərinin Rusiya Federasiyasına birləşdirilməsi məsələsində ölkələrin ərazi bütövlüyü prinsipindən çıxış edir. Sentyabrın 30-da Vladimir Putin bu ərazilərin Rusiyanın tərkibinə daxil edilməsi haqqında fərman imzalayıb.

Bundan əvvəl cənab Tokayev bildirmişdi ki, Qazaxıstan “DXR” və “LXR” kvazidövlət qurumlarını tanımayacaq. Onun sözlərinə görə, Qazaxıstan müasir dünya sərhədlərinin sabitliyə zəmanət verdiyinə inanır. Oktyabrın əvvəlində Qazaxıstan BMT Baş Assambleyasının “Donetsk və Luqansk xalq respublikaları”nın, habelə Xerson və Zaporojye vilayətlərinin Rusiyaya birləşdirilməsi ilə bağlı referendumları pisləyən qətnaməyə səsvermədə bitərəf qalıb.

Türk Dövlətləri Təşkilatının sammiti bu gün, noyabrın 11-də Səmərqənddə keçirilir. Təşkilata Azərbaycan, Qazaxıstan, Qırğızıstan, Türkiyə və Özbəkistan daxildir.

Səxavət