Hərbçiləri daşıyan maşın qəza törətdi: 16 nəfər həlak oldu

Qondarma "Donetsk xalq respublikası"nın Şaxtyorsk rayonunda yük avtomobili ilə mikroavtobusun toqquşması nəticəsində 16 nəfər həlak olub.

Publika.az xəbər verir ki, bu barədə TASS-a fövqəladə hallar xidmətindən məlumat verilib.

“Şaxtyorsk-Torez avtomobil yolunda hərbçiləri daşıyan yük avtomobili mikroavtobusla toqquşub. 16 nəfər həlak olub, üç zərərçəkən xəstəxanaya yerləşdirilib”, - agentliyin həmsöhbəti bildirib.

O, ölənlər arasında yük maşınının sürücüsünün də olduğunu bildirib.

Qeyd olunur ki, Operativ xidmətlərin əməkdaşları hadisə yerində işləyir, qəzanın baş vermə səbəbləri araşdırılır. Təcili yardım xidməti, həmçinin bildirib ki, xəsarət alanlar reanimasiyadadır.

"Zərərçəkənlərdən üçünün vəziyyəti ağırdır, onlar hərbçilərdir və reanimasiyadadırlar", - deyə mənbə bildirib.

Regionun Səhiyyə Nazirliyi xəsarət alanların sayının 6-ya yüksəldiyini bildirib.

"Üç zərərçəkən qəzadan sonra Torez mərkəzi şəhər xəstəxanasına, üçü isə Şaxtyorska gətirilib", - "DXR" Səhiyyə Nazirliyi bildirib.

Səxavət