Hərbçilərimiz "AKINCI" idarəetmə kursunu bitirdilər - FOTO

Türkiyənin Tekirdağ şəhərində yerləşən Çorlu Uçuş Təlim Mərkəzində “Baykar” Müdafiə Sənayesi Şirkəti tərəfindən təşkil edilən “AKINCI” silahlı pilotsuz uçuş aparatını idarəetmə kursu”nun növbəti buraxılışına həsr olunan mərasim keçirilib.

Mərasimdə “Baykar” şirkətinin təmsilçiləri, ictimaiyyət nümayəndələri, kursun rəhbər və müəllim heyəti, eləcə də Azərbaycanın Türkiyədəki səfirliyinin Hərbi attaşelik aparatının əməkdaşları iştirak ediblər.

Səfirlikdən Publika.az-a verilən məlumata görə, Türkiyə və Azərbaycanın dövlət himnlərinin səsləndirilməsi ilə başlayan mərasimdə iki qardaş ölkənin şəhidlərinin əziz xatirəsi bir dəqiqəlik sükutla yad olunub.

Məzunlar çıxışlarında mərkəzdə yaradılmış hərtərəfli şəraitdən danışaraq, onların yüksək səviyyəli kadr kimi yetişməsində böyük rolu olan kursun rəhbər və müəllim heyətinə minnətdarlıqlarını ifadə ediblər.

Azərbaycan Silahlı Qüvvələrinin hərbi attaşesi, polkovnik Müşfiq Məmmədov kursu müvəffəqiyyətlə bitirən hərbi qulluqçularımızı təbrik edərək, onlara Azərbaycan Respublikasının müdafiəsi naminə gələcək xidməti fəaliyyətlərində uğurlar arzulayıb.

Tədbirin sonunda kursu bitirən türkiyəli və azərbaycanlı məzunlarla sertifikatlar təqdim edilib.