İrəvandan ittiham: Hibrid hücumlar Azərbaycan və Türkiyədən gəlir

Ermənistana qarşı hibrid müdaxilələr əsasən Rusiya, Türkiyə və Azərbaycan kimi müxtəlif ölkələrin media platformalarında yer alır.

Publika.az xəbər verir ki, bunu hakim “Mülki Müqavilə” Partiyasından olan parlament üzvü Lilit Minasyan 27 martda Milli Məclisdə keçirilən ənənəvi brifinqdə bildirib.

Onun sözlərinə görə, əvvəlcə hibrid hücumun mahiyyətini aydın şəkildə anlamaq lazımdır.

Minasyan bildirib: "Əvvəlcə müxalifətimizi hibrid hücumun nə olduğunu anlamağa və yalnız bundan sonra hər hansı bir iddia irəli sürməyə çağırıram.

Hibrid hücumlar informasiya sahəsində də daxil olmaqla, müxtəlif istiqamətlərdə həyata keçirilə bilən xarici müdaxiləni nəzərdə tutur”.

Parlament üzvü vurğulayıb ki, "xarici müdaxilə baxımından ölkələr fərqlidir və biz onun təzahürlərini Rusiya, Türkiyə və Azərbaycan mətbuatında çox açıq və aydın şəkildə görürük".

Onun sözlərinə görə, bu cür müdaxilə əksər hallarda Ermənistanın Baş naziri və hakimiyyəti haqqında da daxil olmaqla, yalan məlumatların yayılmasında özünü göstərir.

Minasyan bildirib ki, "Nəşrlər vətəndaşları çaşdırmaq üçün müxtəlif anonim veb saytlarda və ya tanınmış veb saytların dəyişdirilmiş adları altında yerləşdirilir".

Deputat qeyd edib ki, hakimiyyət orqanları bu cür nəşrlərə dərhal reaksiya verməyə və yalan məlumatlar geniş yayılmazdan əvvəl onları təkzib etməyə çalışırlar.

O, həmçinin medianı rəsmi təkzibləri izləməyə və saxtakarlığa qarşı mübarizəni dəstəkləməyə çağırıb:

“Biz bu cür məlumatları proaktiv şəkildə təkzib etmək üzərində işləyirik. Mən medianı bu təkzibləri izləməyə və yaymağa çağırıram".

Tural