Moskva görüşünün ən əsas fikri bu idi – Asim Mollazadə

“Moskvada baş tutan görüşdə ondan qabaqkı razılaşmanın demək olar ki, tam icra olunması müzakirə mövzusu olub. Bu da Azərbaycanın böyük qələbəsinin müəyyən qədər təsdiq olunması deməkdir”.

Bunu Publika.az-a açıqlamasında Azərbaycan, Rusiya və Emənistan rəhbərlərinin iştirakı ilə baş tutan Moskva görüşünü şərh edərkən Azərbaycan Demokratik İslahatlar Partiyasının (ADİP) sədri, millət vəkili Asim Mollazadə deyib.

Millət vəkili bildirib ki, bununla yanaşı, görüşdə Azərbaycan Naxçıvanla kommunikasiya əlaqələrinin bərpası məsələsinə nail oldu. Eyni zamanda, çox önəmli bir məsələ Dağlıq Qarabağ münaqişəsinin artıq tarixə qovuşmasıdır:

“Düşünürəm ki, bu nüansın ifadəsi Moskva görüşünün ən əsas fikri idi. Münaqişə artıq tarixə qovuşub. Biz hazırda bölgədə iqtisadi, nəqliyyat əməkdaşlığı barəsində düşünməliyik. Azərbaycanın regionda həyata keçirilən layihələrində revanşizmə və ərazi iddialarına son qoyan Ermənistan da iştirak edə bilər. Bu, Azərbaycanın hər zaman dilə gətirdiyi bir məsələdir”.

ADİP sədrinin fikrincə, müvafiq imzalanan saziş də gələcəkdə belə bir əməkdaşlığın mümkünlüyünü ifadə edir:

“Ermənistan bu razılaşmalardan imtina etməyə cəhd göstərə bilər, amma rəsmi İrəvanın bunu etməyə gücü yoxdur. Ermənistanın yeganə xilas yolu qonşularına qarşı ərazi iddialarını unutmasıdır. Eyni zamanda, qonşularla normal münasibət qurmağa çalışmalıdır. Əks halda Ermənistanın bir dövlət kimi mövcudluğu bu regionda mümkün olmayacaq”.

Tural Turan