Həmin qələbənin simvolu Cıdır düzündəki Novruz tonqalıdır - RƏY

"Azərbaycan Prezidenti Şuşada, Cıdır düzündə Novruz tonqalını yandırdı. Bu tonqal böyük qayıdışın, Azərbaycan xalqının şanlı qələbəsinin tonqalıdır".

Bunu Publika.az-a açıqlamasında millət vəkili, Azərbaycan Demokratik İslahatlar Partiyasının (ADİP) sədri Asim Mollazadə ölkə başçısı İlham Əliyevin Şuşa səfərinə və orada bayram tonqalı ətrafındakı çıxışlarına münasibət bildirərkən söyləyib. Millət vəkili bildirib ki, 28 illik işğaldan sonra Azərbaycan xalqı öz torpaqlarını düşməndən azad etdi:

"İndi Azərbaycan öz mədəni paytaxtında böyük ümidlə gələcəkdə Qarabağın cənnətə çevriləcəyi planını hazırlayır. Mən əminəm ki, Prezidentin bu istiqamətdə dünyaya verdiyi mesajlar sülhə və əmin-amanlığa çağırışdır. Ölkə başçısı Şuşadakı bayram tonqalı ətrafındakı çıxışında Qarabağa böyük qayıdışla bağlı dünyanı dəstək göstərməyə dəvət etdi. Cıdır düzündə alovlandırılan Novruz tonqalı ilk növbədə tərəfdaşlığa və əmin-amanlığa çağırışdır. Eyni zamanda, dünyanın bu prosesdə iştirakına çağırış simvoludur. Əminəm ki, 44 günlük müharibədə böyük qələbə qazandığımız kimi, Qarabağa qayıdış və onun cənnətə çevrilməsində də Azərbaycan xalqı qalib olacaq. Həmin qələbənin simvolu Cıdır düzündəki Novruz tonqalıdır".

Tural Turan