Birinci vitse-prezidentinin köməkçisi: Ağdam Naqasaki, Hiroşima ilə müqayisə edilir

Ağdam şəhərinin bugünkü vəziyyətini Naqasaki, Hiroşima, Vukovar, Sarayevo, Drezden kimi şəhərlər ilə müqayisə edirlər.

Publika.az xəbər verir ki, bu barədə Azərbaycanın Birinci vitse-prezidentinin köməkçisi Elçin Əmirbəyov beynəlxalq analitik mərkəzlərin nümayəndələrinin Ağdam rayonuna səfəri zamanı jurnalistlərə açıqlamasında deyib.

“Bu, birinci dəfə deyil, siz özünüz də görürsünüz ki, bir neçə dəfə müxtəlif xarici qruplar buraya səfər edib. Bu gün gəlmiş qonaqlar 15 ölkədən çox beyin mərkəzində çalışan siyasətşünaslardan, politoloqlardan ibarətdir. Bu, o insanlardır ki, hərəsi öz ölkəsində bu mövzu ilə bağlı, Ermənistan və Azərbaycan arasında baş verən münaqişə ilə bağlı vəziyyəti işiqlandırır”, – Elçin Əmirbəyov bildirib.

O deyib ki, buna görə, həmin ölkələrdə bu mövzuda vəziyyətin və reallıqların, həqiqətlərin çatdırılması baxımından bu səfərlərin rolu çox böyükdür.

“Ona görə də onların buraya gəlməsinin əsas səbəbi Ermənistan tərəfindən Azərbaycana qarşı, bizim xalqımıza qarşı törədilmiş bu vəhşiliklərin nədən ibarət olduğunu öz gözləri ilə görməsidir. Bilirsiniz ki, öz lobbiçilik qüvvələrinə əsaslanaraq ermənilər özləri bu işğalı və vandallığı törətdiklərinə baxmayaraq, yenə də bizə qarşı informasiya müharibəsi aparırlar. Sözsüz ki, bu baxımdan bu cür səfərlər davam etdiriləcək, müxtəlif qonaqlar yenə də buraya gətiriləcək və vəhşiliyə məruz qalmış şəhərləri bir-bir göstərəcəyik”, - o qeyd edib.

“Ağdam şəhərinə gəldikdə isə, doğrudan da, biz bayaqdan bir neçəsi ilə danışdıq və onlar bu şəhərin bugünkü vəziyyətini Naqasaki, Hiroşima, Vukovar, Sarayevo, Drezden kimi şəhərlər ilə müqayisə edirlər. Hətta deyirdilər ki, müəyyən mənada burada böyük dağıntılar görüblər. Burada keçmiş diplomatlar da var, Azərbaycanla, Cənubi Qafqazla maraqlanan mütəxəssislər var. Ona görə də onların gedib bu həqiqətləri çatdırmasında böyük əhəmiyyət var”, – E.Əmirbəyov bildirib.