Bu, turizmin inkişafına ciddi təkan verəcək - RƏY

"İşğaldan azad olunmuş ərazilərin bərpası ilə bağlı Prezident İlham Əliyevin elan etdiyi strategiya ən müasir, innovativ metodları özündə əks etdirməklə yanaşı, yüksək ekoloji standartlara cavab verir. Bu baxımdan həmin ərazilərdə "ağıllı şəhər" və "ağıllı kənd" layihələrinin tətbiq olunması iqtisadi, sosial, nəqliyyat, mədəni-məişət və bir çox problemlərin həll olunması ilə nəticələnəcək".

Bunu Publika.az-a açıqlamasında Milli Məclisin deputatı Nəsib Məhəməliyev deyib. Deputat bildirib ki, sözügedən layihələr orada məskunlaşacaq insanların komfort həyatını təmin edəcək, turizmin inkişafına ciddi təkan verəcək:

"Turizm sahəsində dünyada gedən tendensiya ondan ibarətdir ki, insanlar kənd turizminə, ekoturizmə, orqanik, təbii qidalara üstünlük verir. Təbiətlə harmoniyada olmağa çalışırlar. Qarabağın iqlimi, su resursları, keyfiyyətli torpağı insan orqanizmi üçün xeyirli məhsulların istehsal olunmasına imkan verir. Üstəlik, termal, müalicəvi suların mövcudluğu, tarixi abidələrin bərpası da turizmin inkişafını şərtləndirən amillərdəndir".

Millət vəkili qeyd edib ki, ölkə başçısının təşəbbüsü ilə Milli Məclisdə “Alternativ və bərpa olunan enerji barədə" qanun layihəsi müzakirə olunur:

"Qanun qəbul olunandan və icrası təmin olunduqdan sonra işğaldan azad olunmuş şəhər və kəndlər yaşayış keyfiyyətlərinə görə ən yüksək tələblərə cavab verəcək. Digər tərəfdən, "ağıllı şəhər" və "ağıllı kənd" layihələrinin tətbiq olunmasının siyasi əhəmiyyətini də qeyd etmək yerinə düşər. Ermənilərin 30 il ərzində o bölgələri vəhşicəsinə dağıtdıqları əraziləri cənnətə çevirməklə kimin kim olduğunu dünyaya sübut etmək imkanımız olacaq".

Tural Turan