Müharibənin taleyinin həll olunmasında onların rolu misilsizdir - Polkovnik

Birinci Qarabağ müharibəsinin dayandığı gündən – 1994-cü il mayın 12-dən Azərbaycan Silahlı Qüvvələri döyüşə hazırlaşırdı. Hər kəsə bəlli idi ki, üzərimizə düşən əsas vəzifə torpaqları işğaldan azad etməkdir və bunun üçün orduda hazırlıq gedirdi. İllərlə müxtəlif hərbi təlimlərdə müxtəlif döyüş əməliyyatları işlənmişdi. Odur ki, döyüş əməliyyatlarını praktiki cəhətdən təlimlərdə dəfələrlə sınaqdan keçirmək imkanımız olmuşdu. Sadəcə onu döyüş şəraitində tətbiq etmək qalmışdı. Bu da 27 sentyabra təsadüf etdi.

Bu sözləri Publika.az-a açıqlamasında polkovnik, hərbi jurnalist Üzeyir Cəfərov deyib. Ekspert bildirib ki, Azərbaycan Silahlı Qüvvələrinin apardığı döyüşlər ilk günlərdən uğurlu oldu:

“İlk döyüşlərdə 4 kəndimiz azad olundu. Bundan sonra uğurların davamı gəldi, Azərbaycan Ordusu bir gün belə geri çəkilmədi, yalnız irəlilədi. Azərbaycan əsgəri bilirdi ki, öz torpağı uğrunda döyüşür, düşmənin üzərinə gedir. Bu missiyanı onlar ilk dəqiqələrdən şərəflə yerinə yetirdilər”.

Ü.Cəfərov qeyd edib ki, qısa müddət ərzində qələbə qazanılmasında və müharibənin taleyinin həll olunmasında xüsusi təyinatlıların rolu misilsizdir:

“Ali Baş Komandan İlham Əliyev xüsusi təyinatlıların komandiri Hikmət Mirzəyevə general hərbi rütbəsini verdi. Xüsusi təyinatlı qüvvələr general Hikmət Mirzəyevin başçılığı altında çox böyük şücaət göstərdi. Orada təkcə Müdafiə Nazirliyinin deyil, Dövlət Sərhəd Xidmətinin, Hərbi Dəniz Qüvvələrinin, Daxili Qoşunların da xüsusi təyinatlıları var idi. Sirr deyil ki, xüsusi təyinatlıların həm əsgəri, həm çavuşu, həm də giziri və bir çox yüksək rütbəli zabiti şəhid oldu. İlk dəqiqələrdən yaxşı nəticələr göstərdilər, çətinliklərə baxmayaraq, qısa müddətdə verilən tapşırığı uğurla yerinə yetirməyə başladılar”.

Aytən Məftun