DSMF sədri yeni sərəncamdan danışdı

Yanvara aid artım fevral ayının pensiyası ilə birgə veriləcək.

Publika.az xəbər verir ki, bunu Dövlət Sosial Müdafiə Fondunun sədri Himalay Məmişov deyib.

Onun sözlərinə görə, sığorta prinsipi ilə pensiya alanlara müvafiq sərəncamla 2022-ci il üzrə 200 manat maddi yardım da veriləcək: "Bu maddi yardım rüblər üzrə bölünərək ödəniləcək. Yeni sərəncamla edilən artımlar pensiyaların orta aylıq məbləğinə münasibətdə təqribən 9% təşkil edir. Artım pensiyaçıların 92 faizinə şamil edilir, bu artım üçün il ərzində əlavə olaraq 352 milyon manat vəsait sərf olunacaq. Sərəncamla istehlak qiymətləri indeksinin illik səviyyəsinə uyğun olaraq sığortaolunanların fərdi hesablarının sığorta hissəsindəki pensiya kapitalları da 6,7% indeksləşdirilməklə artırılır. Sərəncam qulluq stajına görə əlavələrlə pensiya təyin edilmiş şəxsləri də əhatə edir. Dövlət başçısı tərəfindən Nazirlər Kabinetinə bu kateqoriyadan olan pensiyaçıların pensiyalarının indeksləşdirilməklə artırılması, habelə 2022-ci il üzrə maddi dəstəyin göstərilməsinə dair təkliflərini 1 ay müddətində təqdim edilməsi tapşırılıb".