Baş nazir: “Sanksiyalar Rusiyanı yox, Avropanı zəiflədib”

Anti-Rusiya sanksiyaları Rusiyaya deyil, Avropa iqtisadiyyatına ziyan vurur - o, tənəzzülə doğru gedir.

Publika.az xəbər verir ki, bu sözləri Səmərqənddə Türk Dövlətləri Təşkilatının liderlərinin toplantısında çıxışı zamanı Macarıstanın Baş naziri Viktor Orban deyib.

Cənab Orbanın sözlərinə görə, Aİ Rusiyanı zəiflətmək və onu sülhə məcbur etmək istəyirdi, lakin bunun əksi baş verir. O, Avropanın Ukrayna münaqişəsinə getdikcə daha çox cəlb olunduğunu, Kiyevi silahla təmin etdiyini qeyd edib və onu sülh yolu ilə həll etməyə çağırıb.

Macarıstanın baş naziri özünün "Facebook" səhifəsində sanksiya əvəzinə iqtisadi əməkdaşlığa çağırıb və Səmərqənddə bəzi mühüm sazişlərin bağlandığını bildirib.

Macarıstan Rusiyadan, xüsusən də Rusiya yanacağından güclü iqtisadi asılılığına görə anti-Rusiya sanksiyalarına qarşıdır. Oktyabrın sonunda Budapeşt Aİ-nin Rusiya enerjisinə qarşı sanksiyalarının qarşısını alacağını bəyan edib. Kiyev hesab edir ki, Viktor Orbanın sanksiyaların səmərəsizliyi ilə bağlı açıqlamaları Rusiya təbliğatının nəticəsidir.

Səxavət