Rusiya mediası Ərdoğandan yazdı: 2022-ci ilin ən uğurlu siyasətçisi...

Türkiyə Prezidenti Rəcəb Tayyib Ərdoğanın Rusiya-Ukrayna müharibəsində vasitəçilik rolu dünya mətbuatında yer almağa davam edir.

Publika.az "Milliyet"ə istinadən xəbər verir ki, Rusiyanın “Kommersant” qəzetində dərc olunan məqalədə prezident Ərdoğan 2022-ci ildə dünyanın ən uğurlu siyasətçisi adlandırılıb.

“Qərb və Şərq Türkiyə prezidenti Rəcəb Tayyib Ərdoğandan asılı vəziyyətə düşüb” , - məqalədə qeyd olunub. Eyni zamanda “Əvəzolunmaz” siyasi xadim olduğu vurğulanıb.

Kirill Krivoşoyevin yazdığı siyasi təhlildə deyilir ki, Ərdoğan 2022-ci ildə dünyanın ən uğurlu siyasətçisi adlandırıla bilər, çünki o, xüsusi hərbi əməliyyat başlayandan bəri münaqişə tərəfləri arasında demək olar ki, vasitəçi statusunu qoruyub saxlayır.

Təhlildə Rusiya ilə Qərb ölkələri arasında davam edən böhranda Türkiyənin əvəzsiz rolu olduğu qeyd olunub, həmçinin enerji məsələsinə də toxunulub. Krivoşoyev bəyan edib ki, Türkiyə bir çox məsələlərdə, o cümlədən Rusiya ilə Qərb arasında enerji böhranında qazın paylanmasında rolu ilə seçilir. Prezident Ərdoğanın liderliyi ilə imzalanan Taxıl Müqaviləsini işıqlandıran qəzetdə həmçinin Türkiyənin NATO-da mühüm söz sahibi olduğu, o cümlədən Finlandiya və İsveçin alyansa daxil olmaq üçün müraciətində qətiyyətli mövqe tutduğu yazlıb.

Aytən Məftun