Futbol diplomatiyası: Lukaşenko İrəvana gələcək?

Martın 29-da Ermənistan millisi Belarus komandası ilə yoldaşlıq oyunu keçirəcək.

Publika.az “Hraparak”a istinadla xəbər verir ki, oun Vazgen Sarkisyan adına Respublika Stadionunda keçiriləcək və saat 18:00-da başlayacaq.

İlk baxışdan adi bir futbol matçı kimi görünsə də, siyasi bir alt məna da nəzərə çarpır. Ermənistan-Belarus oyunu iki ölkə liderləri arasında münasibətlərin son illərdə əhəmiyyətli dərəcədə pisləşdiyi bir fonda baş verir. Xüsusilə Kollektiv Təhlükəsizlik Müqaviləsi Təşkilatı çərçivəsində baş verən hadisələrdən sonra İrəvan-Minsk münasibətləri əslində gərginlik mərhələsinə qədəm qoyub.

Ermənistanın baş naziri Nikol Paşinyan hətta açıq şəkildə bəyan edib ki, Aleksandr Lukaşenko ölkə lideri olduğu müddətcə özü və heç bir digər Ermənistan rəsmisi Belarusa səfər etməyəcək. Bu bəyanat təkcə siyasi deyil, həm də simvolik əhəmiyyət kəsb edir və dərin etimad böhranını vurğulayır.

Bu kontekstdə qaçılmaz bir sual ortaya çıxır: əgər Paşinyan Ermənistan rəsmilərinin Belarusa səfər etməyəcəyini açıqlayarsa, onda Belarus prezidenti idman tədbiri çərçivəsində İrəvana gələ bilərmi və ya gələcəkmi?

Futbol tez-tez "siyasətdən kənar" bir sahə kimi təqdim olunsa da, beynəlxalq təcrübə dəfələrlə göstərib ki, xüsusən də belə gərgin münasibətlərdə hətta yoldaşlıq oyunları da siyasi simvollara çevrilir.

Tural