Ermənistanda da ət bahalaşdı: Səbəbi nədir?

Ermənistanda mal ətinin qiymətində kəskin artım qeydə alınıb. Sahibkar və fermer Arutyun Mnatsakanyan bu artımın əsas səbəbləri kimi ölkədə mal-qara sürüsünün azalmasını və Qazaxıstan tərəfindən ət ixracına tətbiq edilən müvəqqəti embarqonu göstərib.

Publika.az xəbər verir ki, bu barədə o, "Sputnik Ermənistan"a müsahibəsində danışıb.

Qiymətlər 12 faizə qədər artıb

Qeyd edək ki, 2026-cı ilin əvvəlindən etibarən Ermənistanda mal əti bazarında ciddi bahalaşma müşahidə olunur. Yanvar ayının məlumatına görə, mal ətinin qiyməti ötən ilin eyni dövrü ilə müqayisədə 11,7-12,8 faiz artıb. Sosial şəbəkələrdə yayılan proqnozlara əsasən, qiymət artımı tələbatla deyil, məhz təklif çatışmazlığı ilə bağlıdır və yaxın aylarda davam edə bilər.

“Bu gün alış-veriş zamanı gördüm ki, demək olar hər yerdə mal ətinin kiloqramı 200 dramdan (85 qəpik) artıq bahalaşıb”, - deyə Mnatsakanyan qeyd edib.

Fermer vurğulayıb ki, vəziyyəti qısa müddətdə sabitləşdirmək asan olmayacaq. Onun sözlərinə görə, mal-qaranın artımı donuzlardan fərqli olaraq azalıb. Buna görə də xəstəlik və ya digər səbəblərlə sürü azaldıqda, onun əvvəlki səviyyəyə qaytarılması uzun zaman tələb edir.

Qiymət artımının gələcək dinamikası qeyri-müəyyəndir

Mnatsakanyan yaxın aylarda qiymətlərin nə qədər artacağını dəqiq proqnozlaşdırmağın çətin olduğunu bildirib. Onun sözlərinə görə, bu, Ermənistanın hansı ölkələrdən ət idxal etməsindən, pərakəndə satıcıların tətbiq etdiyi mənfəət marjasından və hökumətin inflyasiyanın qarşısını almaq üçün atacağı addımlardan asılı olacaq.

Qeyd edək ki, Ermənistan hazırda Rusiya, Belarus və Hindistandan ət idxal edir.

Adəm