Bahar yorğunluğuna qarşı bitki çayları

Bir çox insan mart-aprel aylarında bahar yorğunluğundan əziyyət çəkir.

Publika.az-ın təqdim etdiyi bitki çayları sayəsində bu problem sizdən yan keçəcək. Əvvəlcədən qeyd edək ki, aşağıda adı çəkilən bütün çayları eyni cür dəmləmək olar. Bitkinin təzə olmasına diqqət edin. Bitkidən bir az götürüb üzərinə yenicə qaynadılmış su əlavə edin. Ağzı qapalı şəkildə 5-15 dəqiqə saxlayın.

Çayı hər dəfə təzə dəmləyib için. Çünki bitkilər suda 1-2 saat qaldıqdan sonra müalicəvi təsirini itirir.

Kirpiotu

Tərkibindəki A, C və E vitaminləri sayəsində immunitet sistemini gücləndirir. Bu bitki bədənin müqavimətini artırır. Antioksidant effekti verdiyi üçün bahar yorğunluğuna qarşı təsirlidir. Gündə 1 fincan içməyiniz kifayət edəcək.

İtburnu

Bu bitki də tərkibindəki C vitamini sayəsində güclü antioksidant hesab edilir. Qanı təmizləyir, bağırsaqların işini asanlaşdırır, immunitet sistemini gücləndirir. Gündə 2 fincan içməyə çalışın.

Yaşıl çay

Yaşıl çayın sağlamlıq üçün faydalı olduğunu bilməyən qalmayıb. Son illərin populyar sağlamlıq trendlərindən olan yaşıl çay tərkibindəki antioksidantlar sayəsində enerji bəxş edir. Bu çay halsızlığın və yorğunluğun qarşısını alır. Gün ərzində 2-3 stəkan içə bilərsiniz.

Ləman Sultan