"Fəsadsız ötüşmür, bir il davam edə bilər" - İMMUNOLOQDAN XƏBƏRDARLIQ

Qrip və COVİD-19 xəstələri, eləcə də bu xəstəlikdən sonra spirtli içki qəbul etməməlisiniz.

Publika.az xəbər verir ki, bu barədə immunoloq Vladimir Bolibok xəbərdarlıq edib. Onun sözlərinə görə, spirt tromboz riskini artırır. Həkim qeyd edib ki, hazırda iki ciddi infeksiya yayılıb: COVİD-19-dan başqa, həm ürək-damar sisteminə hücum edən, həm də xüsusilə damarların daxili qişasını zədələyən “donuz qripi”. Bu, bir müddət sonra tromboz təhlükəsi də yaradır.

"Alkoqol, xüsusən də həddindən artıq spirtli içki qəbul etmək qan laxtalanması ilə tromboz riskini daha da artırır: birincisi, bu, qırmızı qan hüceyrələrinin yapışması ilə əlaqədardır, ikincisi, spirtli içkilər susuzluğa səbəb olur. Statistika göstərir ki, spirtli içkilər həmişə infarkt, insult və əzaların trombozu təhlükəsi yaradır, qrip və koronavirus infeksiyalarında vəziyyəti daha da ağırlaşdırır", - Bolibok "Sputnik" radiosuna müsahibəsində izah edib.

Həkim qeyd edib ki, test cavabları normallaşsa, xəstəlikdən sonra spirtli içki qəbul edə bilərsiniz. Bununla belə, o xatırladıb ki, spirtin təhlükəsiz dozası yoxdur.

"Əgər xəstə olmusunuzsa, yaxşı olardı ki, uzun müddət istifadə etməyəsiniz. Buna dair dəqiq bir zaman çərçivəsi yoxdur, hər şey fərdidir. İnsan özünü yaxşı hiss etsə belə, testlər bunun əksini göstərə bilər. SARS, qrip və koronavirus infeksiyası fəsadsız ötüşmür, qan dövranının pozulması bir ay və ya bir il davam edə bilər", - mütəxəssis qeyd edib.

Aytən Məftun