“Sevgi hormonu” qorxuya qalib gəlməyə kömək edir - Alimlərdən yeni kəşf

Yaponiyada aparılan yeni araşdırma sevgi və sosial bağlılıqla əlaqələndirilən oksitosin hormonunun qorxuya qalib gəlməkdə mühüm rol oynaya biləcəyini ortaya qoyub.

Publika.az xəbər verir ki, alimlər beynin paraventrikulyar talamus (PVT) bölgəsində oksitosin reseptoru daşıyan xüsusi neyron qrupunu araşdırıblar.

Siçanlar üzərində aparılan təcrübələr bu neyronların həm sosial davranış, həm də təhlükənin artıq keçdiyini öyrənmə prosesində iştirak etdiyini göstərib.

Tədqiqat zamanı həmin neyronların fəaliyyəti zəiflədildikdə siçanların sosial əlaqəyə marağı azalıb və əvvəllər qorxu yaratmış, lakin sonradan təhlükəsiz hala gəlmiş mühitdə qorxu reaksiyasını azaltmaqda çətinlik çəkiblər.

Alimlərin fikrincə, nəticələr oksitosinin beyində sadəcə “güvən hormonu” kimi fəaliyyət göstərmədiyini, təsirinin konkret sinir dövrələrindən asılı olduğunu göstərir.

Araşdırma oksitosinlə əlaqəli bu neyron şəbəkəsinin sosial davranış və qorxu mexanizmlərinin öyrənilməsi baxımından yeni istiqamət aça biləcəyini göstərir.

Araşdırma “Brain” jurnalında dərc olunub.

Müəllif: Roza