Təbabətdə son yüzilin ən böyük uğuru... - Nazir müavini

Bir çox xəstəliklər uşaqlıq dövründə aşkarlanır. Onları vaxtında müalicə etməklə uşaqlar arasında əlilliyin yaranması, eləcə də ölüm hallarının qarşısının alınmasına çalışırıq.

Publika.az xəbər verir ki, bunu səhiyyə nazirinin müavini Rahim Əliyev V Ümumrespublika Forumunda çıxışı zamanı deyib.

O qeyd edib ki, son 10 ildə 700-ə qədər səhiyyə ocağı yenilənib: "Onların böyük qismində uşaqların müalicəsinə yardımlar göstərilir. Son yüz illiyin ən böyük uğurlarından biri vaksinasiya prosesi və ana-uşaq ölümlərinin sayının azalmasıdır. Uşaq vaxtı vurulan peyvəndlər sayəsində qızılca, vərəm, difteriya və sair xəstəliklərdən qorunmaq mümkün olub.

2019-cu ildə Ümumdünya Səhiyyə Təşkilatının (ÜST) araşdırması zamanı insanların peyvəndə etibarsız yanaşdığı ortaya çıxdı. Lakin maarifləndirmə tədbirləri sayəsində peyvəndlərə etibar yarandı. Ölkədə icbari tibbi sığorta hesabına uşaqlara xüsusi diqqət ayrılır. Təbabətin dəlil və sübutlara əsaslanan nəticələri peyvəndlərin infeksion xəstəliklərdən qoruduğu sübut edilib”.

Rahim Əliyev əlavə edib ki, 2 il əvvəl Operativ Qərargahın qadağalarına ciddi riayət edilmirdisə, bu gün açıq havada tibbi maska taxılması məcburi olmadığı halda maska taxırlar: "Bu da sağlamlıq mədəniyyətinə əvvəlkindən daha çox diqqət edildiyini göstərir”.