Yağış İsmayıllıya ciddi ZİYAN VURDU - RƏSMİ (FOTO)

İsmayıllı rayonunda güclü yağış və sel suları 10 evi yararsız hala salıb

Bu barədə Publika.az-a İsmayıllı rayon İcra Hakimiyyəti başçısının birinci müavini, rayon Fövqəladə hallar komissiyasının sədri Rövşən Ağayev məlumat verib. Onun sözlərinə görə iyun ayının 1-də axşam saatlarında müşahidə edilən kəskin hava şəraiti və aramsız yağışlar rayonun elektrik xətlərinə və yollarına ciddi ziyan vurub:

“Təbiət hadisəsi xüsusilə rayonun Diyallı kəndinə ciddi ziyan vurub. Kəndin Mədəniyyət Evinin binasının birr hissəsi yararsız hala düşüb. Binada məskunlaşan bir məcburi köçkün ailəsi təxliyə edilib və müvəqqəti olaraq çadırla təmin edilib. Bununla bağlı Qaçqın və Məcburi Köçkünlərlə İş üzrə Dövlət Komitəsinə məlumat vermişik. Ailəyə dəyən maddi mənəvi ziyanın, ev əşyalarının təmin olunmasına köməklik göstərilir. Bundan başqa, kənd ərazisində 10-a yaxın evin dam örtüyü uçub. Evlər təhlükəli vəziyyətdədir. Hazırda həmin evlərin siyahısı hazırlanıb və dəymiş ziyanın ümumi məbləği müəyyənləşdirilir. Sığortası olan evlərin sənədləri sığorta şirkətinə təqdim olunacaq".

R.Ağayev aramsız yağışların rayon ərazisində 4 min hektardan çox taxıl sahəsinə ziyan vurduğunu bildirib:

“50 hektar taxıl, 2 hektar isə tütün sahəsi su altında qalaraq tamamilə yararsız hala düşüb. Elektrik təsərrüfatına, su xətlərinə və yollara dəyən ziyan aradan qaldırılıb. Hadisə nəticəsində xüsusilə Talıstan və Mücü kəndlərində su xətləri dağılıb, kəndlərə aparan yolları sel yuyub. Hazırda kənd sakinlərinə elektrik enerjisinin verilişi bərpa edilib. Kəndlərə gedən yollarda isə bərpa işləri aparılır”.

Könül Cəfərli