SOSİAL XİDMƏTÇİ institutu necə işləyir? - Agentlikdən AÇIQLAMA - FOTO

Bu il Agentlik tərəfindən tənha və əlilliyi olan 6150 şəxsə evlərində sosial-məişət xidmətləri göstərilib. Onların 5400-dən çoxu ahıl, yəni yaşı 70 və yuxarı olanlardır.

Bu barədə Publika.az-a Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyinin (SXA) İctimaiyyətlə əlaqələr şöbəsindən bildirilib:

"Daimi olaraq əmək qabiliyyətli qohumları və ya qanuni nümayəndələri ilə eyni yaşayış məntəqəsində yaşamayan və sosial xidmətə ehtiyacı olan tənha ahıllara, ahıl ər-arvada, əlilliyi olan şəxslərə sosial xidmətçilər tərəfindən evdə (səyyar) sosial xidmətlər göstərilir. Sosial xidmətçilər tənha ahıl və əlil şəxslərin evlərinə gedərək onlara ev təsərrüfatı işlərində, gündəlik tələbat mallarının alınmasında, digər işlərdə köməklik göstərirlər".

Şöbədən onu da vurğuladılar ki, son illər SXA-nın ahıl şəxslər üçün sosial xidmət müəssisəsində müasir tələblərə uyğun şərait yaradılıb, 5 mərtəbəli, 170 yerlik əlavə korpus istifadəyə verilib:

"Bununla da onlar üçün çarpayı sayı 300-ə çatdırılıb. Hər bir otaq zəruri məişət avadanlığı, o cümlədən soyuducu, televizor və s. ilə təmin olunub. Sakinlərin yaşayışı, keyfiyyətli sosial xidmətlərlə əhatə olunmaları, asudə vaxtlarını mənalı keçirmələri üçün də şərait yaradılıb. Müəssisədə kitabxana və idman zalları, müəyyən əl işlərilə məşğul olmaq üçün emalatxanalar və s. ahılların istifadəsindədir. Hazırda sosial xidmət müəssisəsində 200-dək ahıl pensiyaçı yaşayır".

SXA həmçinin tənha ahılların sosial təminatında mühüm yer tutan pensiya təminatında son illər ciddi artımlar baş verib:

"Son 4 ildə minimum pensiya 2,2 dəfə, orta aylıq pensiya 75 faiz, yaşa görə orta aylıq pensiya 70 faiz artıb. 2019-cu ilin əvvəlindən pensiyaların avtomatlaşdırılmış qaydada təyinatına başlanıb və ötən dövrdə 70 minədək pensiyanın elektron sistem üzərindən proaktiv qaydada təyinatı həyata keçirilib. BMT Avropa üzrə İqtisadi Komissiyasının Siyasi İcmal buraxılışında, Azərbaycan fəal yaşlanma sahəsində müsbət təcrübə nümunəsi olan ölkələr sırasında daxil edilib".

Rövşən Ziya