Köpəkbalığı qəbiristanlığı tapıldı

Alimlər Hind okeanındakı Kokos adalarının sahillərində böyük miqdarda köpəkbalığı qalıqları aşkar ediblər.

Publika.az xəbər verir ki, bu barədə Avstraliya Dövlət Elmi və Tətbiqi Tədqiqatlar Assosiasiyası (CSIRO) məlumat yayıb. Qalıqlar Avstraliya dəniz parklarının biomüxtəlifliyini araşdıran ekspedisiya tərəfindən aşkar edilib. “Bir neçə növ yırtıcıya aid 750-dən çox fosilləşmiş köpək balığı dişini tapdıq. Onların arasında qədim meqalodon köpəkbalığının dişləri də var", - deyə alimlər bildirir. Ən qədim fosillər, təxminən 12 metr uzunluğunda böyük yırtıcı balıq olan meqalodonun ən yaxın qohumlarına aid idi. Tapıntılar arasında mako və ağ köpəkbalığı kimi müasir növlərin dişləri də var.

Bundan əlavə, alimlər Avstraliyaya xas olan, əvvəllər məlum olmayan zolaqlı köpəkbalığı da tuta biliblər. Növ, təxminən 150 metr dərinlikdə yaşayır və elm adamları onların həyat tərzi və davranışları haqqında, demək olar ki, heç nə bilmirlər. Meqalodonlar, təxminən 3,5 milyon il əvvəl nəsli kəsilmiş nəhəng köpəkbalığı növüdür. Uzunluğu 15 metr, çəkisi 40 tondan çox ola bilərdi.

Ayşən Rəhim