Bu, Fazil Mustafaya yox, Azərbaycana atılan güllədir - Deputat

“Nəticə etibarilə bu sui-qəsd cəhdinin hədəfində başqası da ola bilərdi. Hesab edirəm ki, məsələ Fazil Mustafa söhbətindən daha geniş bir anlayışdır. Ona görə ki, bu gün parlamentdə fəal deputatlar dövlətimizin maraqlarını qorumağı bacarırlar. Onlar həm ölkə daxilində, həm xarici tribunalarda Azərbaycanın mövqeyini qorumağa qadirdirlər. Biz bunu müşahidə edir və görürük. Bu, hər zaman belə olacaq. Fazil Mustafa mövqeyini bildirən və partiya maraqlarını ölkə maraqlarından üstün tutmayan bir siyasətçidir. Ona atılan güllə Azərbaycana atılan güllədir. Heç bir şəkildə qəbuledilməzdir”.

Bu sözləri Publika.az-a açıqlamasında deputat Aydın Mirzəzadə deyib.

Deputat bildirib ki, sifarişçilərin bu hadisəni törətməkdə bir sıra maraqları olub.

“Onlar hesab edirlər ki, üzdə olan və fəallığı ilə seçilən millət vəkillərindən birinə qarşı sui-qəsd etməklə cəmiyyətimizi silkələyəcəklər. Səhv düşündülər, Azərbaycan cəmiyyəti daha da sıx birləşdi, dövlət və iqtidarla bir yerdə olduğunu göstərdi.

Bu gün ölkəmizi sarsıtmaq istəyən qüvvələr növbəti dəfə məğlubiyyətə uğradı. Şübhəsiz ki, qısa zamanda bu terror hadisəsinin sifarişçiləri, tərtibçiləri cəzalarını alacaqlar. Bununla Azərbaycanı qorxutmaq, qətiyyətli səsi susdurmaq olmaz.

Tezliklə Fazil Mustafanın şəfa tapmasını arzulayıram”.

Ayşən Rəhim