Azərbaycan əhalisinin neçə faizi Ermənistanla sülh istəyir? - Sorğu

Ölkə əhalisinin 77,3%-i Azərbaycan və Ermənistan arasında sülh müqaviləsini dəstəklədiyini bildirib.

Publika.az xəbər verir ki, bu barədə Sosial Tədqiqatlar Mərkəzi məlumat yayıb.

Sorğu əsnasında ilk növbədə respondentlərin Azərbaycan və Ermənistan arasında sülh razılaşması ilə bağlı prosesləri və xəbərləri izləmələrinə dair məlumatlılıq səviyyəsi öyrənilib. Nəticələrə əsasən, respondentlərin mütləq əksəriyyəti və ya 85,2%-i Azərbaycan və Ermənistan arasında sülh razılaşması ilə bağlı prosesləri və xəbərləri izlədiyini qeyd edib. Respondentlərin cəmi 14,8%-i prosesləri izləmədiyini bildirib.

Ümumilikdə, vətəndaşlara ünvanlanan “Azərbaycanla Ermənistan arasında sülh müqaviləsinin olmasını dəstəkləyirsiniz?” sualı ilə bağlı rəy sorğusunun nəticələrinə əsasən, iştirakçıların 77,3%-i Azərbaycan və Ermənistan arasında sülh müqaviləsini dəstəklədiyini bildirib. 20,6% respondent bu barədə əks mövqedə qərarlaşıb, 2,1%-i fikir bildirməkdə çətinlik çəkib.

Nəticələrin gender aspektdən təhlili sözügedən mövzuda kişi və qadınların bərabər səviyyədə müsbət mövqedən çıxış etdiyini göstərib.

Nəticələri respondentlərin təhsil səviyyələri üzrə təhlil etdikdə ali təhsillilərin 82,7%-i, orta təhsillilərin 72,2%-i Azərbaycan və Ermənistan arasında sülh müqaviləsini dəstəkləyib.

18-24 yaş qrupunu təmsil edənlərin 76,9%-i, 65-dən yuxarı yaş qrupuna mənsub olanların 87,3%-i analoji mövqedən çıxış edib.

Ayşən