Laçında restoranda dava düşdü, 2 nəfər həbs edildi

Laçın şəhərində restoranda dava düşüb, iki nəfər həbs edilib.

Publika.az Teleqraf-a istinadən xəbər verir ki, hadisə Laçın şəhəri ərazisində yerləşən “Aynalı” restoranında baş verib.

Rayon sakini, 2002-ci il təvəllüdlü Vüqar Səfərov və 1993-cü il təvəllüdlü Vaqif Cəfərov sərxoş vəziyyətdə uca səslə nalayiq ifadələr işlədib və orada olan Vüsal Babayevi (ad-soyad şərtidir-red.) təhqir etməklə ictimai qaydanı pozub.

Hadisəni törədən Səfərovun barəsində İnzibati Xətalar Məcəlləsinin 510-cu (xırda xuliqanlıq) maddəsi ilə ittiham elan edilib.

İş üzrə ifadə verən təqsirləndirilən şəxs ona elan olunmuş ittiham üzrə özünü təqsirli bilib. O bildirib ki, Laçın şəhəri ərazisində yerləşən “Aynalı” restoranında sərxoş halda ucadan nalayiq söyüşlər söyərək səs-küy salıb, orada olan Vüsal Babayevi söyərək təhqir edib: “Sərxoş olduğum üçün orada baş verənlərdən xəbərim olmayıb. Bununla da bilməyərəkdən xırda xuliqanlıq əməlini törətmişəm”.

Bu işə Laçın Rayon Məhkəməsində baxılıb. V. Səfərov və V. Cəfərovun hər birinin barəsində 5 gün müddətinə inzibati qaydada həbs edilib. Onların cəzaçəkməsinin əvvəli bu ilin noyabrın 4-dən hesablanması qərara alınıb.