Ani baş verən yanğınlardan özümüzü necə qoruyaq?

Son zamanlar ardıcıl yanğınların baş verməsi insanların təhlükəsizlik və ilkin yardımı ilə bağlı sualları gündəmə gətirir.

Bəs ilkin yardım necə olmalıdır?

Publika.az xəbər verir ki, təhlükəsizlik məsələləri üzrə ekspert Elmar Nurəliyev bildirib ki, yanğın baş verən anlarda insanların panikaya düşməsi vəziyyəti daha da ağırlaşdırır, buna görə də ilkin müdaxilə qaydalarını bilmək həyati əhəmiyyət daşıyır.

"Yanğın zamanı ilk olaraq hadisə yerindən təhlükəsiz məsafəyə çəkilmək və təcili olaraq "112" xidmətinə məlumat vermək lazımdır. Əgər yanğın kiçik həcmdədirsə və alov genişlənməyibsə, onu oddan qoruyan sadə vasitələrlə su, qum və ya yanğınsöndürən balon vasitəsilə söndürmək mümkündür. Yanğın tüstüsü sürətlə yayıldığı üçün otaqdan çıxarkən bədən mümkün qədər yerə yaxın saxlanılmalı və ağız-burun yaş parça ilə örtülməlidir. Elektrik cihazlarının alışdığı hallarda suyun istifadəsi təhlükəlidir və yalnız elektrik cərəyanı tam kəsildikdən sonra müdaxilə edilməlidir".

Ekspert qeyd edib ki, yanğın zamanı liftdən istifadə etmək olmaz və insanların pilləkənlərlə təxliyə olunması uyğundur. Yanğınsöndürmə xidmətinin gəlib çıxmasına qədər doğru addımlar atmaq həm şəxsi təhlükəsizliyi, həm də yanğının böyüməməsini təmin edir.

(Milli.az)