Cənubi Qafqaz

Paşinyanı tənqid edən keşiş işdən çıxarılır

1 Dekabr 2021 10:59

"Buranı tərk edəcəksən Nikol, eşitdinmi?" - ifadəsi ilə Ermənistanın baş naziri Nikol Paşinyanı və onun komandasını sərt şəkildə tənqid edən erməni keşiş işdən çıxarılır.

Publika.az xəbər verir ki, bu barədə "Hraparak" qəzeti yazır. Mənbənin bildirdiyinə görə, keşiş Qazar Petrosyanın işdən çıxarılması məsələsi bu gün Ümumi Kilsə toplantısında müzakirə olunacaq.

Erməni Apostol Kilsəsi də faktı təsdiqləyib. Bildirilib ki, Qəmərlidə (ermənilər Artaşat deyir) keçirilən yerli özünüidarə seçkiləri zamanı Q.Petrosyan hakimiyyəti sərt şəkildə tənqid edib və onları "böcək" adlandırıb.

Keşiş daha əvvəl Ermənistanın Xristian-Demokrat Partiyasının Ağsaqqallar Şurasının təbliğat videosunda da hakimiyyəti qınayan fikirlər səsləndirib.

Tural Turan