Danielyandan KRİTİK AÇIQLAMA: "İrəvan bunu etsə, Ermənistan yerindəcə məhv olacaq"

"Ermənistanın Roma Statutunu ratifikasiya etməsini qeyri-dost addım kimi qiymətləndirən Rusiya rəsmi Yerevanın hər iki ölkəyə aid məsələlərdə Haaqa Beynəlxalq Məhkəməsinin qərarlarının tətbiqini istisna edəcək ikitərəfli dövlətlərarası saziş imzalamaq təklifinə cavab vermir. Yəni Ermənistan Rusiyaya həmin müqaviləni imzalamağı təklif edib ki, Ermənistan məhkəmənin Vladimir Putinin saxlanma qərarından yan keçə bilsin".

Publika.az xəbər verir ki,bunu erməni politoloq Stepan Danielyan “Hraparak”a müsahibəsində deyib.

O bildirib ki, Putinin Haaqa məhkəməsinə verilməməsi üçün ikitərəfli saziş bağlamaq təklifi Rusiyaya edilib. Politoloqun fikrincə, bu, absurddur, çünki Ermənistan Rusiya prezidentini həbs edə bilməz:

"Ermənistan Vladimir Putini həbs etsə, Ermənistan yerindəcə məhv olacaq. Ona görə də rusların və ya onların prezidentinin həbs olunmaması üçün Rusiya ilə belə bir müqavilə imzalamaq istədikləri barədə deyilənlər, sadəcə olaraq, real mövzudan yayınmadır. Problem ondadır ki, Rusiya Roma Əsasnaməsinin ratifikasiyasını Putini həbs etməkdən qorxduqları üçün yox, Qərbin təsir dairəsinə daxil olmaq üçün atılan addım hesab etdikləri üçün anti-Rusiya addımı hesab edir".

"Çox gülməli haldır ki, onlar Əliyevə qarşı Haaqa Məhkəməsinə iş qaldıraraq özlərini Azərbaycandan qoruya biləcəklərini düşünürlər. Bu, absurddur, cəfəngiyyatdır.

Bu, belə bir sual doğurur: əgər nizamnamə fayda vermirsə, onda ratifikasiyanın məqsədi nədir, xüsusən də ABŞ, Rusiya və bir çox başqa dövlətlər o qanunu qəbul etmirlər. Bunun mənası nədir? Mənim üçün o məsələ anlaşılmazdır, hakimiyyət bununla hansı problemi həll etməyə çalışdığını açıq şəkildə bildirməlidir. ABŞ Roma Statutuna qoşulmayıb, çünki bu ölkə hesab edir ki, öz vətəndaşlarını yalnız onlar mühakimə edə bilər, başqa heç bir ölkə edə bilməz. Hesab edirəm ki, heç bir özünə hörmət edən ölkə nizamnamənin ratifikasiyasına qoşulmayacaq", - deyə o bildirib.

Xatırladaq ki, Roma Nizamnaməsi Ermənistan parlamenti tərəfindən oktyabrın əvvəlində 60 səslə ratifikasiya edilib.

Hüseyn İbadlı