Bu il bütün fəaliyyətimizdə Şuşanı xatırlayacağıq - Nazir

Bu gün Beynəlxalq Muğam Mərkəzində Mədəniyyət Nazirliyinin təşkilatçılığı ilə "Şuşa söhbətləri" lahiyəsinin təqdimatı keçirilib.

Publika.az xəbər verir ki, tədbirdə bir sıra mədəniyyət nümayəndələri ilə yanaşı, Mədəniyyət naziri Anar Kərimov da iştirak edib.

Nazir çıxışında bildirib ki, "Şuşa söhbətləri" "Şuşa İli"nə həsr edilib: "Biz bu il bütün fəaliyyətimizdə Şuşanı xatırlayacaq və təbliğ edəcəyik. Ali Baş Komandanın rəhbərliyi ilə ordumuzun qəhrəmanlığı sayəsində biz bu gün "Şuşa İli"ni bayram kimi qeyd edirik. Şuşa bizim mədəniyyətimizin, mədəni elitamızın beşiyidir. Ona görə də bu il Şuşanın əhəmiyyəti haqqında xalqımıza danışmağa çalışacağıq. Biz tanınmış incəsənət xadimlərini, tarixçilərimizi və s. dəvət edəcəyik ki, "Şuşa söhbətləri" çərçivəsində bu şəhərin xalqımızın tarixində, mədəniyyətində rolunu bizlərə anlatsınlar və beləliklə cəmiyyətimizlə dialoq platforması yaranmış olsun".

A.Kərimov bu ictimai müzakirələrdə hər kəsi fəal iştirak etməyə dəvət edib: "Bu gün ilk görüş keçirilir. Bundan sonra isə hər ay bu paneldə görüşlər keçiriləcək. Bu müzakirələrin Şuşada da keçirilməsi planlaşdırılır. Hər birinizini "Şuşa İli" və Torpaq çərşənbəsi münasibətilə təbrik edirəm".