“Nuru Paşa”nı kim yazıb? - AYB-dən AÇIQLAMA

“Bu məsələ ilə bağlı onu deyə bilərik ki, hazırda bir əsərlə bağlı iki müəllif bir-birini ittiham edir. Ortada isə heç bir sübut yoxdur”.

Bunu Publika.az-a açıqlamasında Azərbaycan Yazıçılar Birliyinin sözçüsü Xəyal Rza “Ədəbiyyat qəzeti”nin şöbə müdiri Sərvaz Hüseynoğlunun “Hüseynbala Mirələmovun “Nuru paşa” romanını mən yazmışam” qalmqallı açıqlamasına münasibət bildirərkən deyib.

Xəyal Rza bildirib ki, təmsil etdiyi qurum Sərvaz Hüseynoğlu ilə bağlı hər hansı qərar qəbul etmək haqqında düşünmür: “Ayrı-ayrı müəlliflər bir-birlərini nədəsə ittiham edirlər. Biz bununla bağlı nə qərar qəbul etməliyik ki?! İndiki halda bu suala cavab istəmək vacib deyil. Ortada sübut yoxdur. Daha əvvəl də bu cür hallarla rastlaşmamışam”.

Yazıçılar Birliyinin sədri Anar Rzayev də məsələdən xəbərsiz olduğunu bildirib.

Qeyd edək ki, Sərvaz Hüseynoğlunun iddialarına Hüseynbala Mirələmovun da açıqlaması gecikməyib və yazıçı bu iddianı “ağ yalan” adlandırıb. H.Mirələmov bu iddiasına görə, S. Hüseynoğlunu məhkəməyə verəcəyini də vurğulayıb.