“Netflix” Bakıya gəlir

Amerikanın məşhur "Netflix" onlayn platformasının nümayəndələri 2022-ci il "Formula 1" Azərbaycan Qran Prisi çərçivəsində ölkəmizə səfər edəcək.

Publika.az xəbər verir ki, "Formula 1" yarışlarından bəhs edən, qısa zamanda böyük tamaşaçı marağı qazanmış "Drive to survive" sənədli serialının 5-ci mövsümündə Bakı yarışı həyəcanlı anları ilə yer alacaq.

Həyəcanverici hadisələrlə yadda qalan öncəki Bakı yarışlarının anbaan görüntüləri məhz bu serialda yer alıb. 2018-ci ildə "Red Bull" komandasının pilotlarının məşhur toqquşması, 2021-ci ildə Maks Ferstappenin yarışın bitməsinə 3 dövrə qalmış qəzaya uğraması, Luis Hamiltonun yarışın restartındakı böyük səhvi kimi dramatik səhnələr Bakı yarışını daha da unudulmaz edib.

“Bakı yuxularıma kabus kimi girir“ - buraxdığı səhvdən sonra Luis Hamiltonun "Mersedes"in komanda rəhbəri Toto Volf ilə söhbət zamanı səsləndirdiyi fikir "Drive to survive" izləyicilərinin diqqətindən qaçmayıb.

Serial yayımlandığı 4 mövsüm ərzində azarkeşlərə "Formula 1" yarışlarının maraqlı məqamlarını, komanda və pilotların real hazırlıq prosesini, həyəcanlı görüntülərini, bir sözlə, "F1" ruhunu daha yaxından hiss etdirməyi bacarıb.