"Bakı sindromu"nun yaranma səbəbini açıqlayan 5 yarış

Bakı Şəhər Halqası unikal olduğu qədər buradakı yarışlarda baş verənlər də fərqliliyi ilə seçilir. Bu tras ilin ən maraqlı yarışına da şahidlik edib, son metrlərdə olan ötməyə də. Azərbaycan Qran Prisi məhz bu səbəblərdən pilotlar arasında "Bakı sindromu" kimi yadda qalıb. İlk 5 yarışda meydana çıxan bəzi statistikalara nəzər salaq.

Publika.az sözügedən statistikanı təqdim edir:

QƏLƏBƏ

Bildiyiniz kimi, Bakı Şəhər Halqasında indiyə qədər heç bir pilot 2 dəfə qalib gələ bilməyib. Yarışlarda nəsə baş verib və buna imkan olmayıb. Məsələn, 2019-cu ilin qalibi Bottas ondan cəmi 1 il əvvəl təkəri partladığı üçün qələbədən məhrum olub. Həmin il zəfər qazanan Həmiltonun da ondan 1 il əvvəl başına qəribə hadisələr gəlib və qalib ola bilməyib. İndiyə qədər burada 3 dəfə "Mercedes", 2 dəfə isə "Red Bull" pilotları finiş xəttini hamıdan tez keçib.

Nəzərə alsaq ki, bu il qələbə uğrunda mübarizə aparan "Red Bull" və "Ferrari"nin 4 pilotundan üçü burada daha əvvəl qalib gəlməyib. Sözügedən statistikanın davametmə ehtimalı yüksəkdir. Təbii ki, son yarışlarda özünü yaxşı göstərən, Bakıda hər zaman əla çıxış edən, ümumiyyətlə şəhər traslarını çox sevən Peres imkan verərsə.

POUL

Tək qələbələrdə yox, poul məsələsində də vəziyyət eynidir – heç bir pilot burada 2 dəfə poulun sahibi ola bilməyib. Cəmi 2 dəfə – 2016-cı ildə Rosberq və 2019-cu ildə Bottas poulu qələbəyə çevirə bilib. Qalan üç halda isə Rikkardo 10-cu, Həmilton 2-ci, Peres isə 6-cı sıradan başladığı yarışda qalib olub – ən geridən başlayaraq yarış qazanan pilot Rikkardodur.

SÜRƏTLİ DÖVRƏLƏR

Yəqin heç bir pilotun iki yarışda ən sürətli dövrənin sahibi ola bilməməsinə də təəccüblənməyəcəksiniz. Bakıdakı yarışlarda sürətli dövrənin sahibi yalnız bir dəfə podiuma çıxa bilib ki, bunu da 2016-cı ildə həm poul, həm də qələbə qazanmış Rosberq edib.

PODİUM

Bakıdakı 5 yarışda ümumilikdə 9 nəfər podiuma çıxa bilib. Onlardan yeddisi bu il də yarışacaq və bu statisikada irəliləmək şansını əldə edəcəklər.

BAKIDA KİM NEÇƏ XAL QAZANIB?

Bakıda 5 yarışda 22 müxtəlif pilot xal qazana bilib ki, onlardan 16-nın bu il də xal hesabını artırmaq imkanı olacaq. Liderlik isə bütün yarışları ilk dördlükdə başa vuran Fetteldədir. Alman pilot Bakıda qələbə qazanmasa da, çox sabit çıxışı ilə seçilib.

Pilotların çıxışları rəqəmlərlə yuxarıda əks olunub. Sözsüz ki, builki yarışdan sonra da ciddi dəyişikliklər olacaq. Ən maraqlı suallardan biri də budur ki, yeni bolidlər trasın rekordlarını qıra biləcəklər?! Bakı Şəhər Halqasının rekordu Valtteri Bottasa aiddir – 1:40.495. Yarışda isə ən sürətli dövrəni Şarl Lekler vurub – 1:43.009. Hər iki nəticə də 2019-cu ildə qeydə alınıb.