ABŞ-ın sanksiyaları Süleyman Kərimovu da "VURDU"

ABŞ Maliyyə Nazirliyi etimad fondunda olan 1 milyard dollardan çox aktivi bloklayıb. Bu pullar rusiyalı oliqarx Süleyman Kərimova bağlı olub.

Publika.az CNN-ə istinadla xəbər verir ki, bu barədə ABŞ Maliyyə Nazirliyinin press-relizində deyilir.

Qeyd olunur ki, “Heritage Trust” Kərimovun ABŞ-dakı aktivlərini idarə etmək üçün 2017-ci ilin iyulunda yaradılıb. 2018-ci ildə oliqarxa qarşı sanksiyalar tətbiq olunsa da, o, vəsaitlərinin bir hissəsini fondda saxlaya bilib.

Daha sonra ABŞ-da məlum oldu ki, Kərimov "Heritage Trust" ilə əlaqəsini gizlətmək üçün bir sıra mürəkkəb hüquqi strukturlardan və cəbhəçilərdən istifadə edib.

"Vəsaitlər ABŞ-ın iri dövlət və özəl şirkətlərinə yatırılıb və bir sıra ABŞ investisiya firmaları və vasitəçiləri tərəfindən idarə olunub. Kərimov və onun etibarlı şəxsləri aktivlərə rəsmi sahiblik əldə etmək üşün ABŞ və qeyri-ABŞ şirkətlərinin müxtəlif təbəqələrindən istifadə edib”, - Maliyyə Nazirliyində qeyd olunub.

Qeyd edək ki, Süleyman Kərimov ABŞ, Böyük Britaniya və Avropa İttifaqının sanksiyaları altındadır. O, Ukraynaya qarşı genişmiqyaslı müharibə başlamazdan əvvəl Rusiyanın ən zəngin 11 adamından biri idi.

Xatırladaq ki, ABŞ və Aİ ölkələri tərəfindən yaradılmış beynəlxalq REPO sanksiya qrupu Rusiya elitasının 30 milyard dollarlıq aktivini bloklayıb.

Qeyd edək ki, Etnik baxımdan ləzgi olan Süleyman Kərimov 1966-cı ildə Dərbənddə dünyaya gəlib. Atası cinayət - axtarış xidmətində hüquqşünas, anası isə "Sberbank" ın mühasibi işləyib. Süleyman ailənin son beşiyi olub. Belə ki, özündən başqa qardaşı (həkimdir) və bacısı (rus dili və ədəbiyyat müəlliməsi) var. Yeri gəlmişkən, Şimali Qafqaz reallıqlarını və S.Kərimovun valideynlərinin işgüzar statusunu nəzərə alsaq onun heç də təminatsız uşaqlığı olmayıb. Qayğısız uşaqlıq və gənclik gələcəyə daha da böyük perspektivlər açıb.

Hüseyn İbadlı