Tramp jurnalisti məhkəməyə verdi

ABŞ-ın keçmiş prezidenti Donald Tramp məşhur amerikalı jurnalist Bob Vudvordu onun razılığı olmadan müsahibələrin audiokitabını dərc etdiyinə görə məhkəməyə verib.

Publika.az xəbər verir ki, bu barədə “ Politico” nəşri məlumat yayıb.

İddia ərizəsində bildirilir ki, Tramp Vudvorda dəfələrlə xəbərdarlıq edib ki, verdiyi məlumatlar yalnız gələcəkdə çap olunacaq kitab üçündür.

Siyasətçi qeyd edib ki, jurnalist səs yazılarını ondan xəbərsiz yayıb və bu da “müəllif hüquqlarını pozur”.

Eks-prezident vurğulayıb ki, audiokitabın satışından heç bir qonorar almadığı üçün maddi itkilərlə üzləşib. “Associated Press”in verdiyi xəbərə görə, Tramp təzminat üçün 50 milyon dollar tələb edir.

İddia ABŞ-ın Florida ştatının Pensakola bölgə məhkəməsinə verilib.

Qeyd edək ki, B.Vudvord “The Washington Post” qəzetinin əməkdaşıdır. O, Uotergeyt qalmaqalına (1972-1974) və ABŞ prezidenti Riçard Niksonun istefasına səbəb olan jurnalist araşdırmasının iştirakçılarından biridir. Vudvord Donald Trampa həsr olunmuş “Qorxu”, “Tramp Ağ Evdə”(2018), “Qəzəb” (2020) və “Təhlükə” (2021) kimi kitabların müəllifidir.

Ayşən