Rusiya prezidentinin Baydenə təqdim etdiyi hədiyyənin qiyməti açıqlandı - FOTO

Rusiya prezidenti Vladimir Putinin amerikalı həmkarı Co Baydenə Cenevrədə keçirilən sammit zamanı təqdim etdiyi hədiyyə 2021-ci ildə amerikalı siyasətçinin aldığı ən bahalı hədiyyə kimi qiymətləndirilib.

Publika.az xəbər verir ki, bu barədə ABŞ Dövlət Departamentinin saytında məlumat verilib.

Putin 2021-ci ildə Amerika liderinə üzərində “Moskva” yazısı olan Xoxloma (taxta üstündə bəzəklər olan qab-qacaq dəsti) hədiyyə edib. Dəstin dəyəri 12 min dollar olaraq qiymətləndirilib. Hədiyyənin alınma şərtlərini göstərən sütunda imtinanın “həm hədiyyə verəni, həm də ABŞ hökumətini utandıracağı” qeyd olunub. Oxşar işarə dünya liderlərinin bütün digər hədiyyələri üçün də keçərlidir.

Öz növbəsində Bayden Cenevrə sammitində Putinə aviator günəş eynəyi və büllur bizon heykəlciyi hədiyyə edib.

Xatırladaq ki, 2021-ci ildə Cenevrədə keçirilən görüşdə Rusiya və ABŞ prezidentləri arasında danışıqlar 4,5 saat davam edib. Görüşlə bağlı liderlər ayrı-ayrılıqda mətbuat konfransı keçiriblər. Qeyd edək ki, konfransın nəticəsi olaraq Moskva ilə Vaşinqton strateji sabitlik və silahlara nəzarət üzrə birgə işi barədə razılığa gəldiyi açıqlanmışdı.

Aytən Məftun