Tramp daha bir sadiq tərəfdarına yüksək VƏZİFƏ VERDİ

ABŞ-ın yeni seçilmiş prezidenti Donald Tramp Pentaqonda işləyən 44 yaşlı Kaş Patelə Federal Təhqiqatlar Bürosunun ( FTB ) direktoru vəzifəsini tutmağı təklif edib.

Publika.az xəbər verir ki, bu barədə o, sahibi olduğu “Truth Social” sosial şəbəkəsindəki səhifəsində məlumat verib.

"Mən qürur duyuram ki, Kaş Patel FTB-nin növbəti direktoru olacaq", - o deyib.

Onun sözlərinə görə, Patel korrupsiyaya qarşı mübarizə aparan, ədaləti və Amerika xalqını müdafiə edən” əla hüquqşünas və müstəntiqdir. O, Patelin "Amerikanın cinayət epidemiyasına son qoyacağına" ümid etdiyini bildirib.

Tramp qeyd edib ki, Patel 2016-cı ildə ABŞ-da keçirilən prezident seçkilərində Moskvaya aid edilən müdaxilənin ifşasında “kritik rol oynayıb”.

44 yaşlı Patel Trampın keçid komandasının üzvüdür və növbəti administrasiyada əsas vəzifələrə namizədlərin müzakirəsində iştirak edir. NBC telekanalının qeyd etdiyi kimi, Patel “Trampın maksimum sadiq tərəfdarı” hesab olunur və o, 2020-ci il seçkilərində qələbənin demokrat Cozef Bayden tərəfindən “oğurlandığına” əmindir. Trampın məğlubiyyətindən sonra Patel “Amerika vətəndaşlarına yalan danışan və Baydenə seçkilərin nəticələrini saxtalaşdırmağa kömək edən” məmurlar və jurnalistlərlə məşğul olacağına söz verib.

Qeyd edək ki, noyabrın ortalarından etibarən siyasətçi növbəti 4 ildə ölkəni idarə edəcək komanda formalaşdırmağa başlayıb.